«Өлүөнэ» уонна Өймөкөөннөөҕү «Тымныы полюһа» туристическай кластердар Уһук Илини сайыннарыы национальнай бырагырааматыгар киирдилэр. Бу туһунан ТАСС суруйар.
«Өлүөнэ» кластерыгар Хаҥалас улууһун туристическай сирдэрэ — Уус Буотама бизонарийа, Тукулаан кумахтаах сирэ, Булуус, Күрүлүүр, Турук хайалара киириэхтэрэ. Кластер уопсай иэнэ 292 тыһ. га. буолуо, Өлүөнэ очуостарыгар диэри сылы эргиччи сылдьар айан суоллааҕынан табыгастаах буолуо.
«Өймөкөөн – Тымныы киинэ» кластер Уус Ньара, Томтор, Өймөкөөн нэһилиэктэригэр туризмы сайыннарар соруктаах. Бырайыак чэрчитинэн арт-галерея, кыһыҥҥы аттракционнардаах сынньанар дьиэ, бултуур уһаайба, туркомплекстар, сынньалаҥ итиэннэ экстремальнай туризм паарката, кыһыҥҥы хайыһар баазата, көстүүнэй комплекса туттуллаллара былааннанар.
