Саха сирин оскуолатын үөрэнээччитэ Дарина Игнатьева эрдэҕэс саастаах оҕолорго анаан суруйар уонна биллэр блогер Луна Марко кинигэтигэр уруһуйдаата. Кинигэ 25 уруһуйдаах таҕыста уонна билигин Германияҕа атыыга тарҕанар, диэн иһитиннэрэр СИА.
Германияҕа Луна Дарко «Пока смерть не разлучит нас» диэн ааттаах кинигэтэ таҕыста. Уруһуйдарын Дьокуускай куорат 17-с нүөмэрдээх орто оскуолатын үөрэнээччитэ Дарина Игнатьева оҥордо.
Кыыс кэпсииринэн, блогер Дарко киниэхэ инстаграм нөҥүө сибээскэ тахсыбыт. Дарина бэйэтин уруһуйдарын 14 сааһыттан социальнай ситим нөҥүө көрдөрөр.
Дарина Луна Дарконы бастыҥ блогерынан ааттыыр.
«Кинигэҕэ мин 25 уруһуйу оҥордум. Сэттэ ый устата уруһуйдаатым. Луна хас биирдии сорудаҕын олус кичэллик быһааран биэрэрэ. Бииргэ алтыһан үлэлээбиппит. Бу биир сыл анараа өттүгэр оҥоһуллубута. Билигин көрдөхпүнэ, өссө үчүгэйдик уруһуйдуохпун сөп эбит. Ол гынан баран олус бэркэ табыллан тахсыбыт! Кинигэҕэ үс эрдэҕэс оҕо (Момо, Мари уонна Пия) туһунан кэпсэнэр, бу кинилэр тустарынан серия 5-с чааһа», — диэн кэпсиир Дарина.
Дарина 3 сааһыттан араас техниканы туһанан уруһуйдуур, билигин 3D Autodesk Maya бырагыраамаҕа боруобаланар. Эдэр худуоһунньук үөрэх туйгуна.
Билигин кыыс сакаасчытыттан 5 кинигэни уонна гонорар тутта. Дарина салгыы үлэлэһэр баҕалаах. Сатаннаҕына кини уруһуйдарынан официальный мерч – былакааттар уонна да атын брендированнай табаардар тахсыахтарын сөп.
