Өрөспүүбүлүкэтээҕи харах балыыһатын кылаабынай бырааһа, «Биир ньыгыл Россия» баартыйа Саха сиринээҕи салаатын сэкирэтээрин солбуйааччыта Иван Луцкан салайааччылаах быраастар бөлөхтөрө ДНР Кировское куоратын балыыһатыгар үлэлэрин саҕалаатылар.
Алтынньы 18 күнүгэр Саха сирин быраастара Кировское балыыһатыгар бастакы эпэрээссийэни оҥордулар. 300-тэн тахса киһи медицина көмөтүн ылла, суруйар СИА,
Биригээдэҕэ тоҕус исписэлиис баар: неврологтар, УЗИ-исписэлиистэр, офтальмологтар, кардиологтар уонна рентген-лабораннар. Быраастар регион олохтоохторугар уонна байыаннай сулууспалаахтарга медицина көмөтүн оҥороллор. «Бэнидиэнньиктэн пациеннары көрүү саҕаламмыта. Күҥҥэ 12–14 чаас үлэлиибит, 50-ча киһини көрөбүт. Биһиги үлэбитин биһирииллэр, дьон биһиги манна биир эрэ күн кэлбэтэхпитин биллэ», – диэтэ Иван Луцкан.
Кировское куорат киин балыыһатын кылаабынай бырааһа Константин Кассе эппитинэн, Саха сирин быраастарыгар көрдөрөөрү дьон сарсыарда 5 чаастан уочараттыыр. «Биһиги өйдөһөбүт, исписэлиистэр үлэлэрэ сыаната биллибэт. Биһиэхэ тохсунньуттан быраас-окулист суох. Хараҕы көрдөрөөрү атын ыаллыы куоракка барыахха наада. Билигин дьон эпэрээссийэттэн тахсан, үөрүүлэриттэн ытыыллар», – диэтэ кини.
Саха сирин быраастара ДНР-га алтынньы 16 күнүгэр кэлбиттэрэ. Ил Дархан Айсен Николаевка быраастары ыытыы туһунан ДНР бырабыыталыстыбатын бэрэссэдээтэлэ көрдөспүтэ.
Хаартыска: Николай Борисов, СИА
