29 Кулун тутар 29.03
  • -14°
  • $ 92,26
  • 99,71

Саха сирин «Көһө сылдьар музейа» Псков куоракка тиийдэ

Читайте нас на
Яндекс Новости
ЯДВ

Дойдуга култуура нэһилиэстибэтин, өрөспүүбүлүкэҕэ Саха АССР төрүттэммитэ 100 сылларын чэрчилэринэн Санкт-Петербург куоракка киэҥ далааһыннаах тэрээһиннэр буола тураллар. Саха сирин норуоттарын музыкатын уонна фольклорун үлэһиттэрэ кэлэн араас көрсүһүүлэри тэрийэ сылдьаллар.

Олортон биир бастакынан Псков куоракка Дойдулар икки ардыларынааҕы III-c киинэ бэстибээлигэр ыҥырыылаах ыалдьыт буолан тиийдилэр. Ол туһунан музей дириэктэрэ Мария Корнилова кэпсээтэ.

Биһигини бу тэрээһиҥҥэ «Ленфильм» сүрүн продюсера Ольга Аграфенина ыҥыран сырытыннарда. Биһиги Псков куорат кырачаан олохтоохторугар «Ньургун Боотур» Олоҥхотунан оҥорбут бастакы анимационнай киинэбитин көрдөрдүбүт. Маны таһынан Акулина Трайзе-Нулгынэч эбээн остуоруйатынан «Чаамыкчаан ньаан кулаар» («Кутуйах уонна хопто»), «Чаамыкчаан ньаан дыликэн» («Кутуйах уонна сахсырҕа») «Чаамыкчаан ньаан һуличан» («Кутуйах уонна саһыл») уонна дьүкээгир норуотун «Эдилвей бухатыыр» туһунан мультиктары көрдөрдүбүт.

Ол иннинэ мустубут дьоҥҥо Сахабыт сирин туһунан, бэйэбит баай култуурабытын билиһиннэрдибит. Оҕолорго салама туох ис хоһооннооҕун кэпсээн туран сылгы сиэлигэр баҕа санааларын этиттэрэн, лиэнтэлэри баайтардыбыт. Бу саламаны салгыы Санкт-Петербург куоракка илдьэн буолуохтаах тэрээһиннэргэ кэлбит дьоҥҥо баайтарыахпыт уонна дойдбутугар илдьэн, музейбытыгар турар Аал-Луук маска ыйыахпыт.

Көрсүһүү түмүгэр оҕолор тугу өйдөөн көрбүттэринэн викторина тэрийдибит. Бэл диэтэр төрөппүттэр урут көрбөтөхтөрүн, истибэтэхтэрин билэн махталларын тиэрдибиттэриттэн олус үөрдүбүт, дуоһуйдубут.

Манна даҕатан эттэххэ, «Көһө сылдьар музей» («Кочующий музей») бырайыакпыт туһунан документальнай киинэ уста сылдабыт. Сүрүн чааһа оҥоһуллубута. Режиссерунан Санкт-Петербургтан Мила Кудряшова буолар. Бу сырыыларбыт түмүктэрин эбэн биэрдэхпитинэ, үлэбит силигин ситиэ.

Түгэнинэн туһанан, айаммытын уйуммут «Конгресс-центр Якутия» тэрилтэҕэ махталбытын тиэрдэбит. Миигин кытта музей методиһа Варвара Обоюкова уонна музейбыт экспонаттарын көрөр-истэр сүрүн үлэһиппит Светлана Никифорова кэлэ сылдьаллар. Бырагыраамабыт киэҥ. Салгыы дойдубут култуурунай киинигэр хас да күннээх тэрээһиннэр күүтэллэр. Дэлэгэссийбэтитигэр эбии учуонай-сэкирэтээрбит Роман Миронов уонна оператор Иван Яковлев холбостулар.

Кэпсэттэ Анфиса Слепцова,

РФ суруналыыстарын сойууһун чилиэнэ, Санкт-Петербург к.

Следите за самым важным и интересным в Telegram-канале и WhatsApp-группе ЯСИА
Тутаах тыллар