«Дохсун» спортивнай комплекска оскуола хамаандаларын ортолоругар футболга өрөспүүбүлүкэтээҕи оонньуулар финаллара буолла. Саха АССР 100 сылыгар аналлаах күрэхтэһиигэ алта хамаанда кытынна.
Кыайыылаахтарынан өрөспүүбүлүкэ анал футбольнай оскуолатын бэрэстэбиитэллэрэ буоллулар. «Оҕолор сыллата тупсан иһэллэрэ киһини үөрдэр. Бу эрчиллиилэр, күрэхтэһиилэр таах хаалбаттарын көрдөрөр. Бүтэһик мүнүүтэҕэ диэри ким кыайыылаах буолара чуолкайа суох этэ, ол гынан баран күүстээх хамаанда кыайда», – диэн СИА-ҕа өрөспүүбүлүкэ футбольнай оскуолатын дириэктэрэ Николай Цыпандин кэпсээтэ.
Күрэхтэһии түмүгүнэн Уһук Илин уокурук юношескай лигатыгар кыттарга Саха сирин сүүмэрдэммит хамаандатыгар кандидаттарын талыахтара.
