Саха сиригэр ититэр сезоҥҥа бэлэмнэнии салҕанар. Быйыл «Теплоэнергосервис» хампаанньа үлэтин тохтоппут Алдан оройуонугар ураты болҕомто ууруллар.
«Оттук сезонугар бэлэмнэнии күүскэ барар, сорох оройуоннарга оттук саҕаламмыта. Балаҕан ыйын 1 күнүттэн үөрэх дьыла саҕаланар, ол быһыытынан оскуолалар уонна оҕо саадтара сылаас буолуохтаахтар. Уопсайынан үлэ куһаҕана суох ыытыллар», — диэтэ Саха сирин баһылыга «Россия 24» телеканалга «Быһа кэпсэтии» биэрии быһа эфиригэр.
Айсен Николаев быйыл «Теплоэнергосервис» хампаанньа үлэтин тохтоппут Алдан оройуона ураты хонтуруолга турарын бэлиэтээтэ.
«Муниципальнай тэрилтэни тэрийэр туһунан быһаарыы ылылынна. Оройуоҥҥа тэрилиннэ, үлэлиир. Бу боппуруос соторутааҕыта Россия энергетикатын миниистирэ Сергей Цивилев таһымыгар көрүллүбүтэ», — диэн Айсен Николаев Алдан оройуонугар ититэр сезон кэмигэр саҕаланыа, туох да саахала суох барыа диэн эрэллээҕин биллэрдэ.
