Саха сиригэр бюджет эйгэтин 54 тыһ тахса үлэһитигэр хамнастара үрдүөҕэ. Өрөспүүбүлүкэ бырабыыталыстыбата РФ президиэнин ыам ыйынааҕы уураахтарынан үлэ төлөбүрүн пуондатын улаатыннарарга быһаарда.
Регион салалтатын пресс-сулууспата иһитиннэрбитинэн, үрдээбит хамнас 2023 сыл тохсунньу 1 күнүттэн саҕалаан ааҕыллар. Хамнас учууталларга, иитээччилэргэ, эбии үөрэҕирии тэрилтэлэрин педагогтарыгар, үрдүк уонна орто профессиональнай үөрэх преподавателлэригэр, наука сотрудниктарыгар, быраастарга, орто уонна кыра медперсоналга, социальнай үлэһиттэргэ, култуура үлэһиттэригэр, тулаайах оҕолорго уонна көрүүтэ-истиитэ суох хаалбыт оҕолорго социальнай өҥө оҥорор тэрилтэ үлэһиттэригэр үрдүүр.
Бюджет үлэһиттэрин хамнастарын үрдэтиигэ 1,9 млрд солк өрөспүүбүлүкэ судаарыстыбаннай бюджетыттан тыырыллыаҕа.
Бары нуорма-быраап аакталара 2023 сыл олунньу бүтүөр диэри ылыллыахтаахтар, диэн бырабыыталыстыбаҕа чуолкайдаатылар.
