2030 сылга диэри реставрацияҕа наадыйар кинигэ уонна докумуон 80% оҥоһуллуоҕа. Ити 4 тыһыынча экземпляр, диэтэ бырабыыталыстыба бэрэссэдээтэлэ Кирилл Бычков. Региоҥҥа консервация уонна реставрация кииннэрэ арылыннылар, ол туһунан суруйда өрөспүүбүлүкэ салалтатын пресс-сулууспата.
«Саха сирин национальнай бибилэтиэкэтигэр регионнааҕы консервация уонна реставрация кииннэрин арыйыы культура уонна үөрэх эйгэлэригэр улахан суолталаах. Киин ураты кинигэлэри, докумуоннары чөлүгэр түһэрэр үлэни ыытыаҕа. История, култуура, наука оруоллара түмүллэ сылдьар баайбыт үйэтитиллиэхтэрэ. Бу барыта хотугу норуоттар тустарынан өйдөбүлү, үгэстэри, култуураны, тылы кэлэр көлүөнэлэргэ чөл хаалларыахтара», — диэтэ Кирилл Бычков.
Кииҥҥэ аҕыс профессионал үлэлиир, бары анал үөрэҕи аастылар. 82 аныгы анал оборудование бэрилиннэ. 2030 сылга диэри Россиятааҕы судаарыстыбаннай бибилэтиэкэ сылын аайы киин сотрудниктарыгар үөрэх ыытыаҕа уонна оборудованиеларынан туһаныыны хааччыйыаҕа.
Фото: sakha.gov.ru
