Бэҕэһээ Саха сирин бырабыыталыстыбатын бэрэссэдээтэлин бастакы солбуйааччы э.т. Петр Алексеев оту тиэйии боппуруостарыгар анаммыт сүбэ мунньаҕы ыытта.
Өрөспүүбүлүкэҕэ сүөһү аһылыгын саппааһа 141449 тоннаҕа тэҥнэһэр. Бүгүҥҥү күҥҥэ улуустар сайаапкаларын быһыытынан 1900 тонна от тиийбэт. Сайын бэлэмнэммит оттон 131 тыһ тонна хаалла.
Өрөспүүбүлүкэҕэ сүөһү аһылыга тиийбэт буолан, Магадантан уонна Амур уобалаһыттан аҕалыахтаах. “Туймаада-Агроснаб” ААУо массыыналара наадыйар улуустарга өссө тохсунньу ыйтан тиэйбиттэрэ. Билигин бу тэрилтэ 632 тонна сүөһү аһылыгын тиэйдэ. “Билиҥҥи туругунан Магадан уобалаһыттан оту тиэйиигэ 18 массыына наада. Өлүөнэни туоруур суол сабыллыан иннинэ оттоох массыыналары туоратыахтаахпыт”, — диэн бэлиэтээтэ Петр Алексеев
“Самартай” ТХПК бэрэссэдээтэлэ Егор Аммосов иһитиннэрбитинэн, хаһаайыстыбаҕа үс массыына айаннаан иһэр. СӨ тыа хаһаайыстыбатын министиэристибэтин Департаменын салайааччыта Василий Чичигинаров этэринэн, 15 массыына Уус Ньараҕа баар.
Суол муус устар 15 күнүттэн 20 күнүгэр диэри сабыллара күүтүллэр. Муус устар 9 күнүнээҕи туругунан Абыйга, Өлөөҥҥө, Бүлүүгэ, Аммаҕа, Тааттаҕа оту 100 быр. тиэйдилэр. Орто Халымаҕа — 1076 тоннаны, Өймөкөөҥҥө – 143 тоннаны, Горнайга – 1125 тоннаны, Уус Алдаҥҥа – 2277 тоннаны, Хаҥаласка – 1224 тоннаны, Намҥа – 1251 тоннаны, Чурапчыга – 2072,9 тоннаны, Мэҥэ Хаҥаласка – 381 тоннаны, Нерюнгрига -256 тоннаны уонна Дьокуускайга – 990 тоннаны тиэйдилэр.
СИА.
