Саха сирэ дойду саамай ааҕар эрэгийиэнинэн буолла. Бочуоттаах ааты сэтинньи 18 күнүгэр Арассыыйатааҕы кинигэ сойууһун бэрэсидьиэнэ, политик Сергей Степашин Дьокуускайга кэлэн, бэйэтинэн туттарыа.
Арассыыйатааҕы кинигэ сойууһун вице-бэрэсидьиэнэ Леонид Палько «Саамай ааҕар эрэгийиэн» күрэх алтыс сылын ыытылларын, эрэгийиэннэр күрэххэ көхтөөхтөрүн Якутия24 ханаалга «Актуальное интервью» биэриигэ кэпсээтэ. «Саха сирэ үгэс быһыытынан инники күөҥҥэ сылдьар. 2015 сыллаахха күрэх бастакы сылыгар эрэгийиэн бастакы күөҥҥэ тахсыбыта, былырыын бастакы түөрт иһигэр киирбитэ. Быйыл да бастакылар ахсааннарыгар киирэрин билэр этибит, ол эрэн ким кыайыылаах буолара бүтэһиккэ диэри кистэлэҥ этэ», — диэтэ Палько.
Күрэх быйыл Кыайыы 75 сылыгар анаммыт. Леонид Палько иһитиннэрбитинэн, өрөспүүбүлүкэҕэ 15 тыһыынчаттан тахса араас тэрээһиннэр ыытыллыбыттар, итинтэн 13 116-та онлайн барбыт. Тэрээһиннэргэ 986 712 киһи кыттыбыт. «Бу сөҕүмэр улахан үлэ», — диэтэ Леонид Палько.
Кыайыылааҕы наҕараадалааһын сэтинньи 18 күнүгэр буолуо. Саха сиригэр бу күн Арассыыйатааҕы кинигэ сойууһун дэлэгээссийэтэ бэрэсидьиэн Сергей Степашин салайааччылаах кэлиэ.
