Бэрдьигэстээххэ П.Д.Аввакумов аатынан киин библиотека Арассыыйаҕа үгэс быһыытынан сылын аайы ыытыллар «Библиотека түүнэ» аахсыйаҕа кыттар. Быйыл «Бүттүүн ааҕыахха» ааҕыы бэстибээли тэрийдэ.
Бэрдьигэстээхтээҕи «Библиотека түүнэ» аахсыйаҕа ааҕааччылары кытта көрсүһүү олус интиэриэһинэй хайысханан ыытылынна.
«Горнайдааҕы библиотечнай ситим Бүтүн Россиятааҕы библиотека күнүн икки бүк үөрүүлээх көрсөр. «Саамай ааҕар улуус» өрөспүүбүлүкэтээҕи куонкуруска бастакы степеннээх диплом ылла уонна улуус библиотекаларыгар ааҕыыга утумнаах үлэтин, уопсастыбаннай олоххо көхтөөх кыттыытын иһин эмиэ бастыҥ буолла. Уопсай кыайыыбытынан ааҕааччыларбытын эҕэрдэлиибит», — диэн СИА-ҕа суруйда бибилэтиэкэр Айталина Санникова.
Библиотека күнүгэр бастыҥ ааҕааччылары бэлиэтээн анал номинация кыайыылаахтара ааттаннылар:
«Бастыҥ эдэр ааҕааччы» — Кривошапкина Ньургуйана Михайловна.
«Библиотекаҕа, кинигэҕэ, ааҕыыга бастыҥ бэриниилээх» — Слепцова Валентина Кирилловна.
«Брайль суругунан анал литература көхтөөх ааҕааччыта» — Новиков Юрий Георгиевич.
«Аҕа дойду Улуу сэриитин историятын хасыһан ааҕааччы» анал аат туттарыллар Потапов Юрий Викторович.
«Бастыҥ ааҕааччы, көхтөөх кыттааччы» — Алексеева Ирина Гаврильевна.
«Кинигэ доҕордоох, ааҕыы аргыстаах дьиэ кэргэн» — Елизавета, Иннокентий Михайловтар.
«Библиотека тэрээһиннэрин көхтөөх кыттааччыта» -Горнайдааҕы Кырдьаҕастарга уонна доруобуйаларынан хааччахтаах дьоҥҥо аналлаах интэринээт-дьиэ коллектива, директор Баишева Айталина Прокопьевна.
«Саамай ааҕар коллектив» — «Кырачаан ымыылар» оҕо уһуйаана, сэбиэдиссэй Москвитина Надежда Николаевна.
Автограф-сессияҕа олохтоох автор, Кировскай олохтооҕо Алексеев Николай Иванович — Мөлдьөөт Өлөөнү «Былыргы сэһэн» кинигэтин 20 тахса киһи көрөн сэҥээрдэ, кэпсэттэ, атыыласта.
“Кинигэ күүһэ» аахсыйа Үлэ сылыгар ананна. Саха норуодунай суруйааччыта Миитэрэй Наумов «Өрөмүөн» диэн кэпсээнин «Горнай Ас” ТХППК диэриэктэрин солбуйааччы Андриан Алексеев эдэр ааҕааччыларга аахта.
Л.Е.Лукина аатынан эбии үөрэхтээһин киинин педагогтара Алена Антонова, Айталина Михеева нэһилиэнньэҕэ сахалыы киэргэл оҥоһугар маастар-кылаас ыыттылар. Библиотекардар Саргылана Михайлова харысхалы, Сардана Абрамова күндү таастан браслеты оҥорууга ааҕааччылары үөрэ-көтө үөрэттилэр. 14-35 саастаах эдэр ааҕааччылар 6 хамаандаҕа арахсан, квиз-оонньууга күрэхтэстилэр. Маннык аахсыйаны тэрийии — ордук ыччат кинигэни умсугуйан ааҕарыгар угуйуу буолар.
Библиотека партнердара «Айар” кинигэ кыһата кинигэлэри, Артикатааҕы государственнай агротехнологическай университет сибэкки, оҕуруот аһын рассадатын атыылаатылар.
Улуус баһылыга Никита Андреев, култуура уонна духуобунай сайдыы управлениетын салайаачччыта Тамара Кесарева, кииннэммит библиотека ситимин директора Анна Иванова эҕэрдэлээтилэр.
