Донецкай Народнай Өрөспүүбүлүкэни кытта доҕордуу сыһыаны бөҕөргөтүү чэрчитинэн Саха сирэ 11 эбийиэги хабан, киэҥ далааһыннаах бырайыагы олоххо киллэрэр былааннаах. Сүрүн болҕомтону суол уонна хомунаалынай инфраструктураны сайыннарыыга, ол иһигэр уу ситимнэрин саҥардыыга, ону тэҥэ социальнай суолталаах тэрилтэлэри, бастатан туран, култуура уонна үөрэх эбийиэктэрин чөлүгэр түһэриигэ ууруохтара. Бу туһунан өрөспүүбүлүкэ баһылыга Айсен Николаев «Саха Сирэ, иннибит диэки!» теле-биэриигэ эттэ.
Саха делегацията Донецкай Народнай Өрөспүүбүлүкэҕэ сырыыта бииргэ үлэлээһини дириҥэтиигэ уонна региоҥҥа бары өттүнэн өйөбүлү оҥорууга туһуламмыт таһаарыылаах көрсүһүүлэр, дьаһаллар түһүмэхтэринэн бэлиэтэннэ. Докучаевскай куоракка ДНР бырабыыталыстыбатын бэрэстэбиитэллэрэ кыттыылаах көһө сылдьар мунньах ыытылынна. Быйылгы дьылы түмүктээтилэр, олору олус ситиһиилээхтэринэн сыаналаатылар.
«Төрөөбүт дойдубут туһугар охсуһар байыастарбытын, Донецкай Народнай Өрөспүүбүлүкэ салалтатын кытта көрүстүбүт. Докучаевскайга көһө сылдьар сүбэ мунньаҕы ыыттыбыт, туттарыллар эбийиэктэри көрөн, 2025 сыл түмүгүн таһаардыбыт, ыытыллыбыт үлэ хаачыстыбатынан уонна кээмэйин өттүнэн олус ситиһиилээх диэн аахтыбыт», — диэн бэлиэтээтэ Айсен Николаев.
Саха сирин баһылыга сүбэ мунньахха 2026 сылга үлэ сүрүн хайысхалара быһаарыллыбыттарын тоһоҕолоон бэлиэтээтэ.
«Донецкай Народнай Өрөспүүбүлүкэни кытта салгыы бииргэ үлэлээһин чэрчитинэн, 11 эбийиэги чөлүгэр түһэрэр былааннаахпыт. Олор ортолоругар суол хаһаайыстыбатын, хомунаалынай инфраструктура эйгэтигэр, ол иһигэр уу сүүрдэр, ону тэҥэ социальнай суолталаах кэккэ тэрилтэлэр, бастатан туран, култуура уонна үөрэх эбийиэктэрин өрөмүөннээһин үлэлэрэ бааллар. Бу уон биир эбийиэги үрдүк таһымҥа өрөмүөннүөхпүт диэн бигэ эрэллээхпит, Донбасска, Докучаевскай куорат уокуругар дьон олоҕо биллэ тупсуоҕа», – диэтэ Айсен Николаев.
