22 От ыйа 22.07
  • 29°
  • $ 88,02
  • 96,04

Саха бааһынайдарыгар чэпчэтиилээх кирэдьиит ыараханнык кэлэр

16:47, 18 апреля 2018
Текст:
Читайте нас на
Яндекс Новости
ЯДВ
Тыа хаһаайыстыбатын уонна ас-үөл бэлиитикэтин министиэристибэтин үпкэ департаменын кирэдьиит боппуруостарыгар эппиэттээх сүрүн исписэлииһэ Герман Николаев этэринэн, дойду бырабыыталыстыбатын уурааҕынан ааспыт сылтан саҕаламмыт АПК 5 бырыһыаннаах кирэдьииттээһинигэр Саха сирин бааһынайдара, кэпэрэтииптэрэ быйыл биирдиилээн уонна бытааннык даҕаны буоллар, хапсан эрэллэр.

Санатан эттэххэ, былырыын күһүн быыс сабыллан эрдэҕинэ Нам улууһуттан “Эрэл” ТХПК эрэ кылгас болдьохтоох кирэдьииккэ тиксибитэ. Онно холоотоххо, иккис сылга хамсааһын баар. Ол курдук, Өлүөхүмэттэн биир фермер кулун тутар 30 күнүгэр Сбербаантан кылгас болдьохтоох кирэдьиити бастакынан ылбыта. Онтон бүгүн-сарсын Сунтаар бааһынайа Алмаасэргиэнбаантан харчытын илиитигэр ылаары сылдьар. “Бөтүҥ” (Амма) уонна “Хахсык” (Хаҥалас) ТХПК-тэрэ бигэргэнэн, бу нэдиэлэҕэ Алмаасэргиэнбаанныын дуогабарга илии баттаһыахтара.

“Бүгүн Москваҕа 6-с түһүмэххэ Сунтаартан, Уус Алдантан, Бүлүүттэн холбоон 8 мөл. солк. суумалаах кирэдьииккэ 3 хаһаайыстыба докумуонун бигэргэтиигэ ыыттыбыт”, — диир Герман Герасимович. Итилэртэн 2 хаһаайыстыба Россельхозбаан нөҥүө кирэдьиит ылыахтаах. Манна сыһыаран эттэххэ, тыа хаһаайыстыбатын өйүүр, сайыннарар аналлаах тэриллибит баан рекламата күүстээх эрээри, дьиҥ дьыалатыгар мөлтөҕө, үлэтэ-хамнаһа үөтэлээбэтэ хомолтолоох.

Ити үөһэ ыйыллыбыттар бары кылгас болдьохтоох (1 сыллаах) кирэдьииккэ суоттанар буоллахтарына, биһиги өрөспүүбүлүкэбититтэн уһун болдьохтоох инвесткирэдьииккэ анньыһааччы соҕотох: “Саюри” ХЭУо Дьокуускай Сыырдааҕар дьоппуон тэпилииссэтин 2-с уочаратын тутарыгар 247 мөл. солк. иэс көрдөөбүт, ыам ыйын саҥатыгар быһаарыы тахсарын күүтэр. Ону тэҥэ, кирэдьииттээһин бэрээдэгэр уларытыы киирэн, Дьокуускайдааҕы көтөр фабриката киирсээри оҥостор сураҕа иһиллэр.

Василий НИКИФОРОВ, edersaas.ru

Следите за самым важным и интересным в Telegram-канале и WhatsApp-группе ЯСИА