Кулун тутар 31 күнүгэр РФ айылҕа ресурсаларыгар уонна экологияҕа миниистирэ Дмитрий Кобылкин, дойду үрдүнэн тахсыбыт уустук балаһыанньанан сибээстээн, регионнарга сааскы булду хааччахтыыр туһунан сүбэлээбитэ. Саха сиринээҕи тустаах министиэристибэ иһитиннэрбитинэн, булка уонна булт хаһаайыстыбатыгар Сэбиэт мунньаҕа буолуоҕа.
СӨ бырабыыталыстыбатын иһинэн үлэлиир булка Сэбиэт мунньаҕар прокуратура, Росприроднадзор, Роспотребнадзор управлениеларын, өрөспүүбүлүкэ наукатын сүрүннүүр тэрилтэлэрин, булчуттар уонна балыксыттар уопсастыбалырын Холбоһуктарын, аҕыйах ахсааннаах хотугу норуоттар бэрэстэбиитэллэрэ, уопсастыбаннай экологтар, Ил Дархан уонна бырабыыталыстыба дьаһалтатыттан кыттыахтара диэн биэдэмистибэ пресс-сулууспата СИА-ҕа иһитиннэрдэ.
РФ Айылҕа харыстабылыгар министиэристибэтин сүбэтин тула кэпсэтиигэ регион уратыта, КМНС-тар, булчуттар бырааптара, булка Сэбиэттэр уонна уопсастыбаннай тэрилтэлэр этиилэрэ учуоттаныаҕа, маны сэргэ РФ бырабыыталыстыбатын «самоизоляцияҕа» ылыммыт миэрэлэрэ, аттынааҕы регионнар быһаарыылара инники күөҥҥэ тутуллуоҕа.
Россия тустаах министиэристибэтэ бигэргэтэринэн, саҥа коронавируснай инфекция, көтөр кэлиитин кытта сиргэ-уокка, дьоҥҥо сэрэҕи үөскэппэт. Ити эрээри «самоизоляция» миэрэтэ киллэриллибитэ биир кэлим быһаарыыны ылары ирдиир.
Санатар эбит буоллахха, «Булт туһунан» федеральнайдааҕы сокуоҥҥа олоҕуран, хааччахтааһыны киллэрии быһаарыыта РФ субъегын үрдүкү дуоһунастаах сирэйинэн, РФ Росприроднадзорын кытта сөбүлэһии кэнниттэн ылыллар.
This post was published on 01.04.2020 16:32 16:32