Россия уонна тас дойдулар күүстээх тустууктара ССРС, РСФСР үтүөлээх тренера Дмитрий Коркин аатынан норуоттар ардыларынааҕы турнирга кыттыахтара. Күрэхтэһии, икки сыл тохтобул кэнниттэн, Дьокуускайга алтынньы 28 — 29 күннэригэр буолуохтара.
Коркин турнирыгар Россия регионнарыттан уонна тас дойдулартан 150 спортсмен кыттыаҕа — Армения, Белоруссия, Иран, Казахстан, Куба, Кыргызстан, Македония, Монголия уонна Таджикистан. Элбэх бөҕөс өрөспүүбүлүкэ киин куоратыгар кэллэ, Саха сирин сүүмэрдэммит хамаандатын кытта тэҥҥэ эрчиллэр.
Кыраһыабай киирсиини Токио-2021 Олимпиада финалистара Магомедхабиб Кадимагомедов уонна Заурбек Сидаков, Россия икки төгүллээх чемпионнара Исраил Касумов уонна Разамбек Жамалов, Азия икки төгүллээх чемпиона, аан дойду чемпионатын призёра, аан дойду Кубогын үс төгүллээх хаһаайына Бехнам Эхсанпур.
Күрэхтэһиигэ кыттыытын Бурятияттан Дмитрий Коркин турнирын түөрт төгүллээх чемпиона Евгений Жербаев бигэргэттэ.
Көбүөргэ саха тустуутун оскуолатын 80 иитиллээччитэ тахсыаҕа. Кинилэр ортолоругар — Россияҕа бастыыр иһин киирсии икки төгүллээх кыайыылааҕа, юниордарга аан дойду тустууга призёра Станислав Свинобоев, Уһук Илиҥҥэ чемпион, Россия уонна норуоттар ардыларынааҕы турнирдар кыайыылаахтара, призердара Ньургун Сергин, аан дойдуга бастыыр иһин киирсии кыайыылаахтара, игирэлэр Алексей уонна Петр Копыловтар, Коркин турнирын мэтээллэрин толору комплегын хаһаайына Максим Толмачев.
