Ойуур баһаара тахсыан сөп кэмэ Саха сиригэр ыам ыйыгар турар. Рослесхоз тэрилтэ салайааччыта Иван Советников эппитинэн, регион кэнники сылларга бастакытын баһаар буолар сезонун толору бэлэм көрсөр.
Саха сирэ баһаар сезонугар бэлэмин федеральнай тэрилтэ бэрэбиэркэлээтэ. Россия экология уонна айылҕа миниистирэ Александр Козлов бэйэтэ тус оробуочай сырыы оҥордо.
«Регион уһун сылларга бастакытын баһаар буолар сезонун толору бэлэмнээх көрсөр. Ити эрээри бу наҕылыйан биэриини таһаарыа суохтаах. Өрөспүүбүлүкэҕэ баһаар сезона дойду үрдүнэн болдьохтон арыый тардыллар — ыам ыйын иккис-үһүс нэдиэлэтэ. Ити эрээри Росгидромет сэрэтэринэн, бэс, от уонна атырдьах ыйдара эмиэ сэрэхтээхтэр. Биһиги хас биирдии оройуонунан ырытыыны оҥордубут, эппиэтинэстээх сирэйдэри быһаардыбыт, ханнык күүс уонна сириэстибэ туттулларын сүбэлэстибит», — диэтэ Иван Советников мунньах кэнниттэн.
Саха сиригэр баһаар сезонугар 1,6 млрд солк федеральнай бюджеттан, регионтан – 77 мөл солк тыырылынна. Якутлесресурс тэрилтэттэн 648 киһи, Авиалесоохрана парашютнай-десантнай сулууспатын сотрудниктара – 555 кыттыахтара. Маны сэргэ, штаты таһынан баһаары утары сулууспалар тэрилиннилэр, манна 285 киһи баар.
