20 От ыйа 20.07
  • 17°
  • $ 88,02
  • 96,04

Перинатальнай кииҥҥэ бүгүн 1000-с оҕо төрөөтө

Читайте нас на
Яндекс Новости
ЯДВ

Дьиэ кэргэн аан дойдутааҕы күнүгэр, сарсыарда 10 чаас 25 мүнүүтэҕэ Перинатальнай кииҥҥэ 1000-с оҕо төрөөтө. Кыысчаан уһуна 54 см., ыйааһына 3600 гр. Икки ый анараа өттүгэр, кулун тутар 12 күнүгэр саҥа аһыллыбыт кииҥҥэ бастакы оҕо төрөөбүтэ.


Бу бырааһынньык күн, ыам ыйын 15 күнүгэр, ЗАГС управлениета 18 оҕоҕо (13 уол, 5 кыыс) төрөөбүтүн туһунан сибидиэтэлистибэтин туттарар үөрүүлээх тэрээһинэ буолла. Бу оҕолор бүгүн дьиэлэригэр таҕыстылар.

Перинатальнай киин аактабай саалатыгар сибэкки тутуурдаах долгуйбут аҕалар, көтө сылдьар чаҕылхай саарыктары туппут оҕолор, үөрбүт-көппүт аймахтар муһуннулар. Онтон, дьэ, утуйа сытар кырачааннарын анал блоктарга сытыаран баран, ийэлэр кэлээскэ курдук үппүтүнэн, киирэн кэлэллэр. Саҥа төрөөбүт оҕолор, хата, ытыс таһыныытыттан, муусука тыаһыттан уһуктубат дьон буолан биэрдилэр.

Кинилэри эҕэрдэлии доруобуйа харыстабылын миниистирин солбуйааччы Людмила Вербицкая, “Арассыыйа ийэлэрэ” хамсааһын салаатын бэрэссэдээтэлэ Прасковья Борисова, ЗАГС управлениетын салайааччытын солбуйааччы Татьяна Комаренко, ыччат, дьиэ кэргэн министиэристибэтин үлэһитэ Татьяна Слепцова, Перинатальнай киин дириэктэрэ Татьяна Павлова, 1-кы №-дээх өрөспүүбүлүкэтээҕи балыыһа дириэктэрин солбуйааччы Ирина Петрова, уо.д.а. кэлбиттэр. Кинилэр хас биирдиилэрэ ийэлэргэ сибэкки дьөрбөтүн, бэлэхтэрин туттартаатылар, истиҥ эҕэрдэлэрин анаатылар.

Людмила Ильясовна:  “Биһиэхэ барыбытыгар бу улахан суолталаах күн. Икки ый иһигэр 1000 кырачаан күн сирин көрдө, ону тэҥэ, анаабыт курдук, Дьиэ кэргэн күнүгэр төрөөбүтэ – историяҕа киирэр бэлиэ түгэн”, — диэн туран, ийэлэри бу дьиэҕэ өссө кэлэллэригэр ыҥырда.

Оттон Прасковья Петровна:Оҕо төрөөһүнэ – киһи тылынан эппэт дьиктитэ. Эһиги иитиигититтэн, тапталгытыттан кини инники олоҕо хайдах буолара тутулуктаах. Дьахтарга ийэ буолууттан үрдүк дьол суох. Кырачааннаргытын эмиийгит үүтүнэн аһатыҥ. Ийэ үүтэ – кытаанах доруобуйа, бөҕө иммунитет төрдө. Оҕолоргут доруобай буолуннар, түргэнник улаатан, куруук үөрдэ сырыттыннар!” – диэн эттэ.

Салгыы ЗАГС управлениетын салайааччытын солбуйааччы Татьяна Комаренко хас биирдии оҕоҕо төрөөбүтүн туһунан сибидиэтэлистибэни үөрүүлээх быһыыга-майгыга туттартаата.

Өрөспүүбүлүкэтээҕи балыыһа, ЗАГС управлениета уонна «Арассыыйа ийэлэрэ» бииргэ үлэлэһэргэ илии баттаабыттара. Ол чэрчитинэн, аны Перинатальнай кииҥҥэ төрөөбүт оҕолор тахсалларыгар тута сибидиэтэлистибэ бэриллэр. Оччотугар төрөппүттэр ЗАГС-ка бара сатаабаттар, арай, эрдэттэн оҕо аатын талыахтаахтар.


Ыспыраапка

Бу аныгылыы киини 2014 сылтан тутан саҕалаабыттара. Перинатальнай кииннэри сайыннарар федеральнай бырагыраама чэрчитинэн, СӨ бырабыыталыстыбатын сэргэ «Ростех» корпорация туппута.

Киин симиэнэҕэ 150 киһини көрөр поликлиника салаалаах. Манна невролог, кардиолог, эндокринолог, офтальмолог, уролог, терапевт курдук исписэлиистэр көмөҕө кэлэллэр. Маны тэҥэ реанимационнай-консультативнай киин, катамнез салаата (1,5 киилэттэн кыра ыйааһыннаах оҕолору көрүү-харайыы), ийэ үүтүнэн аһатыы киинэ үлэлииллэр. Перинатальнай киин аныгы медицинскэй тиэхиникэнэн толору хааччыллан турар.

Ангелина ВАСИЛЬЕВА, “Саха сирэ” хаһыат, edersaas.ru

Андрей Сорокин түһэриилэрэ.

 
Следите за самым важным и интересным в Telegram-канале и WhatsApp-группе ЯСИА