Саха сирин оҕо сайыҥҥы лааҕырдара үлэ сезонугар бэлэмнэрин саҕалаатылар. Онтон орто уонна үрдүк үөрэх кыһатын устудьуоннарыгар үлэни көрдүүллэригэр тоҕоостоох кэм буолла. Быйыл өрөспүүбүлүкэҕэ эмиэ былырыыҥҥы курдук 521 лааҕыр үлэлиэҕэ (2022 с. – 521), олортон 426 — күнүскү, 38 куорат таһынааҕы стационарнай, 39 үлэ уонна сынньалаҥ, 18 балааккалаах лааҕыр. Манна барытыгар үлэһиттэр наадалар, диэн СИА кэпсиир.
“Муус устар бүтүүтэ 14-тэн үөһээ саастаах оскуола оҕолоруттан устудьуоннарга диэри анаан, үс күннээх оонньуулары (игропрактика) үөрэтэр интенсив оҥороору сылдьабыт. Тэрээһини Ф.И.Авдеева аатынан Оҕо дыбарыаһа, “Юные горожане” бырайыак чэрчитинэн ыытыаҕа, салайааччы Неймохова Надежда”, — диэн Ф.И.Авдеева аатынан оҕо дыбарыаһын эбии үөрэхтээһинин старшай педагога Анна Захарава иһитиннэрдэ.
Анна Дмитриевна этэринэн, 14-тэн үөһээ саастаах оҕолор баһаатай көмлөһөөччүтүнүэн үлэлиэхтэрин син. Ордук улууска арыллар лааҕырдар бу курдук үөрэҕи ааспыт үлэһиттэргэ наадыйаллар, анаан үөрэттэрэ да ыытыахтарын син.
“Оҕо сынньалаҥын тэрийэр туспа уустуктардаах. Билигин оҕолор гаджеттарга сөбүлээн олороллоро кистэлэҥ буолбатах. Онон баһаатай элбэх оонньуулары билэр эрэ буоллаҕына, оҕолорго интэриэһи үөскэтэр кыахтаах. Биһиги былырыын баһаатайдары сайыҥҥы үлэҕэ бэлэмниир гына биир нэдиэлэлээх оскуола тэрийэн үлэлэппиппит. Барыта 100 эдэр киһи бу оскуоланы ааспыта, уонна бары кэриэтэ былырыын сайын оҕо лааҕырдарыгар этэҥҥэ үлэлээбиттэрэ. Быйыл арыый даҕаны элбэх киһини хабаары үс күннээх интенсив оҥорорго соруннубут. Маныаха, интенсивы ааспыт педагогтарга квалификацияларын үрдэппиттэрин туһунан туоһу сурук туттарыллар”, — диэн тэрийээччи тоһоҕолоон бэлиэтээтэ.
Санатан эттэххэ, быйылгы сайыҥҥы сынньалаҥ кэмигэр ураты болҕомтону байыаннай дьаһалга (СВО) сылдьар дьон оҕолоругар ууруохтара, босхо путевкаларынан хааччыйыахтара. Барыта холбоон өрөспүүбүлүкэ лааҕырдарыгар 43 580 оҕо сынньаныаҕа, бу былрыыҥҥыттан 927 оҕонон элбэх.
