Ыам ыйын 1 күнүттэн оҕо лааҕырыгар сурутуу саҕаламмыта. 2023 сылтан Госуслуги порталга оҕо лааҕырга сынньанар хайысхатын ылыахха син буолла, диэн СИА Дьокуускай куорат үөрэҕин управлениетыгар сигэнэн иһитиннэрэр.
Быйыл өрөспүүбүлүкэ бүддьүөтүттэн Дьокуускай куорат уокуругар оҕо сайыҥҥы сынньалаҥын тэрийэргэ 77 мөл. солкуобай көрүллүбүтэ, 47 мөл. 742 тыһ солкуобай сайыҥҥы хонуктаах сынньалаҥ лааҕырдарга субсидия быһыытынан ананна. Маны таһынан, байыаннай дьаһалга сылдьар төрөппүттэрдээх оҕолор сынньалаҥнарыгар эбии 18 мөл солкуобайы тыырдылар, — диэн Дьокуускай куорат дьаһалтатын үөрэх управлениетыгар начальнигы солбуйааччы Егор Охлопков бэлиэтээтэ.
“Мин быйыл оҕолорбун иккис сылын “Спутник” лааҕырга ыытабын. Сайаапкалары хомуйуу саҕаланаатын кытары Госуслуги киирэн толорбуппут. Манна элбэх киһи биир кэмҥэ киирэр буолан туһунан остуоруйа. Көмпүүтэртэн киирэр буоллаххына, cookie ыраастыаххын эҥин наада. Быйылгы субсидия суумата 15 813 солкуобай. Лааҕыр испииһэккэ киллэрбитин туһунан биллэрдэ эрэ путевканы бу субсидияны көҕүрэтэн төлүүбүт. Мин икки оҕом лааҕырга сынньанар буолан, биһиэхэ бу улахан көмө. Өссө кэргэним үлэтигэр эмиэ хас эрэ быраһыанын төннөрүөхтэрин син. Былырыын туристическай оҕо кешбэга диэн баара, манна биэс күнүнэн 20 тыһыынча каартаҕар төттөрү төннөр этэ. Быйыл хомойуох иһин, бу өйөбүл дойду үрдүнэн үлэлээбэт. Оҕолор сайыны лааҕырга сынньанаары олус күүтэллэр. Онон лааҕырбыт эппиэтин долгуйа күүтэбит”, — диэн төрөппүт Татьяна Васильева кэпсиир.
“Дьокуускай куорат уокуругар хонуктаах биэс сайыҥҥы сынньалаҥ лааҕыра үлэлиир: “Бинго”, “Радуга”, “Спутник”, “Каландарашвили”, “Родничок”. Хас биирдии лааҕыр оҕону батарар кыамтата, сыаната тус туһунан, биһиги саайтпытыгар толору ыйылла сылдьар. Үгүс төрөппүт “Кэскил”, “Сосновый бор”, “Энергетик” лааҕырдар Дьокуускай куорат дьаһалтатын аннынан үлэлиир дии саныыр, ол эрээри бу лааҕырдар өрөспүүбүлүкэтээҕи буолаллар. Ыам ыйын маҥнайгы күнүттэн төрөппүттэр Госуслуги сайт нөҥүө сайыҥҥы лааҕырдарга сайаапкаларын ыыппыттара. Билигин лааҕырдар оҕолор испииһэктэрин чочуйа сылдьаллар”, — диэн үөрэх начальнигын солбуйааччы чопчулаата.
1. Төрөппүт сайабылыанньата (сокуоннай бэрэстэбиитэл).
2. Сайабылыанньа суруйбут киһини туоһулуур докумуон копията.
Дьиэ кэргэн хас субсидиянан туһаныан сөбүй?
Манна хааччахтааһын суох. Үс оҕолоох ыал үс оҕотугар үһүөннэригэр даҕаны чэпчэтиилээх путевка ылыан син.
Путевка сыаната төһөнүй?
Хас биирдии лааҕырга тус туһунан сыана, быһа холоон 35 000 солк 45 000 диэри барар.
Күнүскү лааҕырдар босхолор дуо?
Үөрэх тэрилтэтигэр сыһыарыылаах күнүскү, үлэ уонна сынньалаҥ, балааккалаах лааҕырдар босхолор.
Прописка ирдэнэр дуо?
Оҕо Дьокуускай куорат уокуругун оскуолатыгар үөрэнэрин туһунан туоһу суруктаах буоллаҕына прописка көрдөрөр наадата суох.
