Саха сириттэн байыастарга анал байыаннай дьайыы ыытыллар зонатыгар Аҕа дойдуну көмүскээччи күнүгэр аналлаах бырааһынньыктааҕы бэлэхтэри тириэртилэр. Өрөспүүбүлүкэ тирэх пууннарын нөҥүө инники күөҥҥэ барыта олохтоох бородууксуйаттан 15 туоннаттан тахса үгэс буолбут набору ыыттылар. Бу туһунан Ил Дархан Айсен Николаев МАХ мессенджерыгар бэйэтин ханаалыгар иһитиннэрдэ.
«Барыта түргэнник тиийэрин туһугар үлэ түүннэри-күнүстэри барда. Хас биирдии баһыылкаҕа төрөөбүт дойду салгына тириэрдилиннэ. Сөбүлүүр амтаннаах астара, Саха сирин сылааһа уонна биһиги хас биирдиилэрин саныырбыт уонна аттыларыгар куруук баарбыт бэлиэтэ. Бэлэх оҥорбут, ону сааһылаабыт уонна тиэрдибит дьоҥҥо барыларыгар махтанабын. Биһиги көмүскээччилэрбитигэр өйөбүл, туох да саарбаҕа суох, инникилээн тутуллар хайысха уонна бүтүн өрөспүүбүлүкэ дьыалата. Биһиги байыастарбыт төрөөбүт сирдэрин өйөбүлүн билэллэрин туһугар, туох баар наадалааҕы салгыы оҥоруохпут. “Кыайыыга бииргэ!»- диэн Айсен Николаев суруйда.
Бэлэх набордарыгар олохтоох деликатестар угулуннулар: таба этэ, балык, халбаһы, балык миинэ, отон утаҕа уонна барыанньа.
Анал байыаннай дьайыыга өйөбүлү “Кыайыыга Бииргэ!” өрөспүүбүлүкэтээҕи хамыыһыйа сүрүннүүр, салайааччыта регион баһылыга Айсен Николаев. 2025 сыллаахха Саха сириттэн инники күөҥҥэ сүүһүнэн техника, тыһыынчанан квадрокоптер, генератордар, сибээс сириэстибэлэрин уонна да атын наадалаах оборудованиелар ыытыллыбыттара.
«Бойобуой ситим линиятыгар сылдьан оҕолору кытта элбэхтик көрсөбүн, кинилэр төрөөбүт өрөспүүбүлүкэ өйөбүлэ кинилэргэ күүс-уох биэрэр, бойобуой тыыны бөҕөргөтөр диэн куруук этэллэр», — диэн урут Саха сирин парламеныгар туһаайыытыгар Айсен Николаев эппитэ.
Тирэх пууннарга түүннэри-күнүстэри үлэһиттэр, волонтердар үлэлииллэрин салгыыллар. Кинилэр таһаҕаһы арыаллыыллар уонна хас биирдии байыаһы өйүүллэр. Госпиталларга бааһырбыттарга көмө туспа болҕомтону уураллар: эмтээһини тэрийиигэ, докумуону толорууга көмөлөһөллөр уонна аймахтарын кытта сибээһи хааччыйаллар.
