Саха сирин бырабыыталыстыбатын бэрэссэдээтэлин солбуйааччы Ольга Балабкина «Якутия24» телеханаалга «Актуальное интервью» биэрии эфиригэр судаарыстыбаннай былаас ситэриилээх органнарын отчуотун түмүгүн, хотугу тиэйии хаамыытын уонна патриотическай иитии туһунан кэпсээтэ. Вице-премьер Горнай, Мииринэй уонна Ленскэй улуустар олохтоохторугар отчуоттаата. Ол туһунан www.sakha.gov.ru сайт иһитиннэрэр.
«Горнай, Мииринэй, Ленскэй улуустарыгар олохтоохтор уопсай суолталаах боппуруостары көтөхтүлэр — эминэн-томунан хааччыйыыны үбүлээһин, тыа хаһаайыстыбатын өйүүр механизмнары тупсарыы. Ленскэй уонна Мииринэй оройуоннарыгар «Мухтуйа» региональнай суолу саҥардыы боппуруоһа тирээн турар. Горнай улууһугар бастакы уочараттаах быһаарыыны — оҕо саадын тутуу ирдэнэр боппуруоһу туруорустулар. Ленскэйгэ “Хотугу» микрооройуону итиинэн хааччыйыы боппуруоһа бастакынан турар. Бырабыыталыстыба отчуотун кэнниттэн оробуочай бөлөх бу микрооройуон олохтоохторун кытта туспа көрсүбүтэ. Мин билигин да өрөспүүбүлүкэ ОДЬКХ уонна энергетика министиэристибэтин иһитиннэрэр уонна балаһыанньаны бииргэ күүскэ быһаарарга оройуону кытта быһаччы сибээһи тутуһабын. Оройуоннар олохтоохторо көтөҕүллүбүт боппуруостара үлэҕэ ылылыннылар», — диэн Ольга Балабкина үллэһиннэ.
Ону сэргэ Ольга Валерьевна хотугу тиэйии 2025 сыллаахха уустук усулуобуйаҕа, ол иһигэр күн-дьыл усулуобуйатынан сибээстээн оҥоһуллубутугар болҕомтотун уурда. Сорох улуустарга аһы-үөлү тиэрдии боппуруостарын ыксаллаах бэрээдэгинэн быһаарарга күһэллибитэ.
«Быйыл тохсунньу 12 күнүттэн Саха сирин бырабыыталыстыбатын, регион үп министиэристибэтин кытта үлэ оҥкула оҥоһулунна. Билигин сокуупка барыта олоххо киирдэ, дуогабардары барытын түһэристэ. Таһаҕаһы тиэрдиигэ күн-дьыл усулуобуйата улаханнык дьайар. Боппуруоһу куруук хонтуруолга тутабыт, күннээҕи мониторинг ыытабыт», — диэтэ Ольга Балабкина.
Ааспыт сыл биир улахан суолталаах түгэнинэн «Патриот» ыччат Киинин арыйыы уонна Дьокуускайга «Буойун Суола» Бүтүн Россиятааҕы байыаннай-тактическай турнир финалын ыытыы буолла.
«Өрөспүүбүлүкэҕэ патриотическай үлэнэн уопсастыбаннай тэрилтэлэр, үөрэх тэрилтэлэрэ дьарыктаналлар эрээри, биир кэлим сүрүннээһин суох этэ. Бүгүн биһиги биир сыл иһигэр тэрээһиннэргэ көхтөөхтүк кыттар эдэр дьон ахсаанын элбэтиини ситиһэр кыахтанныбыт диэн көрөбүт. Ону таһынан «Патриот» инфраструктураны тэрийдилэр, ааннара ыччакка аһаҕас. Онно араас хайысхаларынан элбэх тэрээһин ыытыллар», — диэн Ольга Валерьевна бэлиэтээтэ.
Маны сэргэ Саха сирин бырабыыталыстыбатын бэрэссэдээтэлин солбуйааччы патриотическай иитиигэ чуолкай, сөптөөх үлэ холобурун быһыытынан, «Буойун Суола» Бүтүн Россиятааҕы турнир кыайыылааҕа Саха сирин хамаандатын бэлэмнээһинин бэлиэтээтэ.
