Өрөбүлгэ, атырдьах ыйын 24 күнүгэр, Новгород уобалаһыгар «өйдөбүнньүк бастионнара» бырайыак чэрчитинэн саха буойуннарын өйдөбүнньүк бэлиэтин аттыгар Шимскай — Старая Русса трассатыгар Старорусскай сиригэр тыыннара быстыбыт 1446 саха буойунун аата киллэриллибит плиталар туруоруллуохтара. Бу туһунан «Россия 24» ханаалга «Быһа кэпсэтии» биэрии кэмигэр Айсен Николаев иһитиннэрдэ.
«Волгоградтан саҕаламмыт Российскай Федерация уобаластарыгар өлбүт саллааттарбыт көмүллэн сытар сирдэригэр мемориаллары тутууга тэрээһиннэрбитин бу өрөбүллэргэ Новгород уобалаһыгар салгыахпыт»,– диэтэ Саха сирин баһылыга.
Саха сиригэр улуу Кыайыы 80 сылын көрсө саҕаламмыт «өйдөбүнньүк бастионнара» бырайыак өрөспүүбүлүкэттэн сэриигэ олохторун толук уурбут биир дойдулаахтарбытыгар регионнарга мемориаллары туруорар сыаллаах. Сотору кэминэн өйдөбүнньүк бэлиэлэр Смоленск, Псков, Калуга уобаластарыгар оҥоһуллуохтара.
Урут Волгоградка Мамаев кургаҥҥа «Якутянам — защитникам Сталинграда 1942–1943 гг.» диэн бастакы өйдөбүнньүк обелиск аһыллыбыта. Монумент Сталинград кыргыһыытыгар Кыһыл армия састаабыгар геройдуу сэриилэспит саха буойуннарын чиэһигэр мемориальнай кылабыыһаҕа туруоруллубута.
Бырайыагы үбүлээһин тэрилтэлэр, судаарыстыбаннай уонна судаарыстыбаннайа суох пуондалар, муниципалитеттар, уопсастыбаннай тэрилтэлэр уонна сэриигэ охтубут саллааттар аймахтарын көмөтүнэн ыытыллар.
