Өрөспүүбүлүкэтээҕи “Муус Устар-2024” ыччат фестивалыгар Нам улууһун эдэр дьоно ситиһии арыалланарыгар П.П. Ядрихинскай-Бэдьээлэ аатынан Олоҥхо дьиэтигэр алгыс этилиннэ.
“Күрэхтэһиигэ сатабылгытын, талааҥҥытын толору сөптөөхтүк туһаныҥ, олоххо киллэриҥ. Нам улууһун аатын-суолун кыайыылаахтык-хотуулаахтык көмүскүүргүтүгэр ыҥырабыт”, – диир Нам улууһун баһылыгын солбуйааччы Юрий Дьяконов.
Саха сиригэр “Муус устар” 2024 таһымнаах фестиваль быһаарыылаах, суолталаах күннэрэ саҕаланнылар. Ол курдук, сарсын Илья Винокуров аатынан педагогическай колледж “Эноджи” устудьуон үҥкүү бөлөҕө “КҮН” аныгылыы үҥкүү куонкурсугар киириэҕэ.
Эҥсиэли хочотун эдэр дьоно бэйэлэригэр эрэллээх буолалларыгар салалта болҕомто уурар. Олоҥхо дьиэтигэр эдэрдэр бэйэ-бэйэлэрин кытта билсэн, бодоруһан биир сомоҕо буолалларыгар оонньуу-тренинг тэрийдилэр. Маннык көрсүһүүлэр, оонньуулар, тэрээһиннэр олус наадалаах буолалларын уһун сылларга оҕону, ыччаты кытта үлэлэһэр Бүтүн Россиятааҕы оҕолор уонна ыччаттар хамсааһыннарын олохтоох салаатын председателэ Анна Ядрихинская бигэргэтэр.
Сыл ахсын буолар “Муус Устар” 2024 тэрээһиҥҥэ араас хайысхаларга Россияҕа биллэр-көстөр сулустар ыалдьыттыахтара, Саха сирин эдэр дьонугар истиҥ тыллары этиэхтэхтэрэ.
“Нам улууһун 80 ыччата 10 сорудахтан 7 сорудах толороро хаалла. “Кыайыахтаахпыт” диэн бэйэбитигэр модун санааны, ис туругу иитиэхтээхпит. Биир санааны ылынан кыттарга бары өттүнэн бэлэм буолуохтаахпыт! “Триумф” спортивнай киин уораҕайыгар Нам улууһун аатын ааттатыахха!” – диир Нам улууһун дьиэ кэргэн уонна ыччат политикатын отделын салайааччыта Екатерина Евставьева.
