Нам улууһугар доруобуйа харыйстабылын эйгэтигэр бэҕэһээ икки улахан тэрээһин буолан ааста. Бөтүҥ нэһилиэгэр саҥа фелдьшерскэй-акушерскай пуун уонна улуус киинигэр күүтүүлээх компьютернай томография кабинета үөрүүлээх аһыллыылара ыытылынна.
Бөтүҥ нэһилиэгэр эрдэтээҥи ФАП эргэрэн, ирдэбилгэ эппиэттээбэт буолбута ыраатта. Онон саҥа тутуллубут ФАП олохтоохторго Саҥа дьылы көрсө дьоһун бэлэх буолла. Тупсаҕай тутуулаах, 107 кв.м уопсай иэннээх дьиэ «Тыа сирин биир кэлим сайыннарыы» государственнай программа чэрчитинэн тутуллан үлэҕэ киирдэ. ФАП аныгы ирдэбилгэ толору эппиэттиир, туох баар медицинскэй оборудованиенан хааччылынна. Манна 2020 сылга «Земскэй фельдшер» программанан үлэлии кэлбит Владислав Павлов олохтоохтору көрүөҕэ-истиэҕэ.
Үөрүүлээх тэрээһиҥҥэ Саха Республикатын Правительствотын председателин солбуйааччы Ольга Балабкина, доруобуйа харыстабылын министерствотын иһинэн ресурснай киин директора Альберт Жирков, улуус баһылыга Юрий Слепцов, Намнааҕы киин балыыһа кылаабынай бырааһа Ариан Сергеев, Бөтүҥ нэһилиэгин баһылыга Михаил Макаров кыттыыны ыллылар.
Нам сэлиэнньэтигэр киин балыыһа иһинэн компьютернай томография кабинетын үөрүүлээх быһыыга-майгыга арыйыы буолла. Бу түгэн үүнэрин улуус дьоно-сэргэтэ ыра санаа оҥостубута ыраатта. 16 быһыылаах PHILIPS фирма компьютернай томография аппарата регионнарга доруобуйа харыстабылын бастакы сүһүөҕүн тупсарыы программанан кэлэн, киин балыыһа поликлиникатын бастакы этээһигэр турда.
Историяны сэгэтэн көрөр эбит буоллахха, улууска рентгенологическай сулууспа сэллик диспансерыгар 1949 сыллаахтан саҕаламмыта. Онтон улуустааҕы киин балыыһа стационарыгар 1975 сыллаахха рентген кабинета аһыллыбыта. Василий Никонов 40-тан сыл тахса рентгенолог бырааһынан бэриниилээхтик үлэлээбитэ.
Аалай кыһыл лиэнтэни Саха Республикатын Правительствотын председателин солбуйааччы Ольга Балабкина, доруобуйа харыстабылын министерствотын иһинэн ресурснай киин директора Альберт Жирков, улуус баһылыга Юрий Слепцов, Намнааҕы киин балыыһа кылаабынай бырааһа Ариан Сергеев, киин балыыһа ветерана, Российскай Федерация доруобуйа харыстабылын туйгуна, Саха Республикатын үтүөлээх бырааһа, Саха Республикатын уонна Нам улууһун Бочуоттаах ветерана Василий Никонов уонна киин балыыһа рентгенолог бырааһа Святослав Кириллин быстылар.
Аныгылыы оҥоһуулаах, үрдүк хаачыстыбалаах саҥа компьютернай томография нөҥүө ыарыыны эрдэттэн сэрэтэргэ олук буолуо, улуус дьонун көрөргө-истэргэ тирэх буолуо диэн эрэнэбит.
⠀
Ааптар: Намнааҕы киин балыыһа пресс-сулууспата
