20 От ыйа 20.07
  • 17°
  • $ 88,02
  • 96,04

Нам сэлиэнньэтин Ипподром түөлбэтэ лапта сезонун түмүктээтэ

16:52, 07 сентября 2018
Текст:
Читайте нас на
Яндекс Новости
ЯДВ

Атырдьах ыйын 28 күнүгэр Нам сэлиэнньэтин Ипподром түөлбэтин түмсүүтэ КСК стадионугар лапта лааҕырын сезонун үөрүүлээхтик түмүктээтэ. Олохтоохтор сайын устата хас киэһэ аайы оҕолорун мунньан лапталыыллар. Араас күрэхтэһиилэри тэрийэллэр. Сынньалаҥы туһалаахтык, бэһиэлэйдик атаарар үгэстэммиттэрэ быйыл бэһис сыла.


Ол курдук, аан бастаан 2013 сыллаахха түөлбэ бастакы салайааччыта Клавдия Степановна Винокурова тэрийэн саҕалаабыт. Онтон ыла түөлбэ билиҥҥи салайааччыта Осипова Татьяна Иннокентьевна, уулусса ыстаарыһалара, активистара — Григорьева Людмила Николаевна, Решетникова Лариса Петровна, Попова Вера Васильевна, Брызгалова Марина Николаевна, Попова Мария Ионовна иккилии буолан уочаратынан дьуһуурустубалаан оонньотоллор, «Веселые старты» ыыталлар.

Күн аайы 20-чэ оҕо кэлэн иккилии чаас оонньуур, төрөппүттэр эмиэ кэлэн оонньоһоллор. Лапта кэнниттэн оҕолорго наҕараада туттараллар, минньигэс аһынан, тордунан күндүлүүллэр эбит. Оҕолор олус интэриэһиргээн кэлэллэр, бириэмэлэрин топ курдук тутуһаллар эбит. Манна атын түөлбэлэр эмиэ кытталлар. Оонньоон баран таарыччы бука бары ипподромнарын тулатын ыраастыыр, хомуйар идэлэммиттэр. Бастаан лапталыы сылдьыбыт оҕолор номнуо оскуолаларын бүтэрэн үөрэххэ барбыттар.

Аны сааскы каникулга Денис Степанович, Дмитрий Филиппович Брызгалов уонна төрөппүттэр көмөлөрүнэн күөлү күрдьэн каток оҥорон оҕолору хаҥкылаталлар эбит. Альбина, Евгений Дьячковскайдар дьиэ кэргэнинэн кэлэн куруутун көхтөөхтүк кытталлар, көмөлөһөллөр, тэҥҥэ оонньоһоллор, хаҥкылыыллар. Кинилэр түөлбэ саамай көхтөөх, спортивнай дьиэ кэргэнинэн буолаллар.

Оҕолор уулуссаҕа көрсө түстүлэр да «Лаптабыт хаһан саҕаланарый?» диэн сүүрэн кэлэллэр, оннооҕор куоракка көрсөн баран «Оо, лапта сылдьар» дии түһэллэр. Салайааччыларын таптаан «Лапта» диэн хос ааттаабыттар.

Бу түөлбэ көхтөөх үлэтэ манан эрэ түмүктэммэт, кинилэр кыһын аны хайа уулусса саҥа дьыллааҕы харыйата бастыҥый диэн күрэхтэһии тэрийэн ыыталлар. Түөлбэ биирдии ыалыттан ыйга 50 солк. төлөбүр хомуйан бириис, наҕараада, оҕолорго минньигэс ас бэлэмнииллэр.

Кырдьык даҕаны, урут сотовай төлөппүөн, көмпүүтэр суоҕуна оҕо барыта таһырдьа, көй салгыҥҥа хойукка диэри оонньуура. Онтон билигин оҕо күнү быһа дьиэҕэ олорон компьютерынан, телефонунан оонньуур, киинэ көрөр, олох хамсаммакка экраны, монитору манаан баран олорор үйэтэ кэллэ. Ону Ипподром түөлбэтин активистара таба өйдөөннөр, оҕолорго, олохтоохторго көхтөөх, туһалаах сынньалаҥы тэрийэллэрэ хайҕабыллаах дьыала, маладьыастар! «В здоровом теле — здоровый дух» дииллэринии түөлбэлэр бары маннык көхтөөхтүк сынньалаҥнарын атаараллара буоллар бэрт буолсу.

Ааптар: Күннэй ДЬЯКОНОВА.

Следите за самым важным и интересным в Telegram-канале и WhatsApp-группе ЯСИА