Муома улууһун Хонуу сэлиэнньэтин олохтоохторо Варвара, Эдуард Соркомовтар түөрт уоллаахтар. Улаханнара оскуола үөрэнээччитэ, үс кыра уол уһуйааҥҥа сылдьаллар.
— Дойдубут Президенэ Владимир Путин кэлэр 2024 сылы Дьиэ кэргэн сылынан биллэрбитин биһиги олус үөрэ иһиттибит. Элбэх оҕо — дьол! Норуот кэскилэ, инникитэ. Ону өйдөөн өрөспүүбүлүкэбит, дойдубут салалталара көдьүүстээх көмөнү, өйөбүлү оҥороллор, — диир ыал аҕа баһылыга Эдуард Сергеевич.
Элбэх оҕолоох дьиэ кэргэн, биллэн турар, түбүгэ да, үөрүүтэ да элбэх.
— Хас биирдии күн — бэлиэ күн. Элбэх оҕолоох дьоҥҥо күн аайы туох эмит ситиһиилээх, туспа үөрүүлээх, ураты күн буолар. Оҕолорбут улахан да, кыра да ситиһиилэрэ — дьол! Элбэх оҕолоох наһаа үчүгэй, — диэн үөрэн мичиҥниир эдэр ийэ Варвара, суруйда «Индигир уоттара» хаһыат.
