Өрөспүүбүлүкэҕэ сааскы халаан уутун этэҥҥэ аһарыыга бэлэмнэнии үлэтэ салҕанар. Уу ресурсаларын федеральнай агентствотын Өлүөнэ бассейнын ууга управлениета былаан быһыытынан сэрэтэр үлэлэри Өлүөнэ уонна Халыма өрүстэргэ мууһу чарааһатыыга ыытар.
Сүрүн сыала – муус чопчу харар учаастактарыгар муус барыытыгар харыы үөскээһинин аччатыы, ити түмүгэр нэһилиэнньэлээх пууннар ууга барыыларын бохсуу.
2006 сылтан саҕалаан харыы үөскүүр сирдэригэр халааны утары сэрэтэр тэрээһиннэр бараллар.
Мууһу чарааһатыы үлэтин “Спецводстрой” ХЭТ оҥорбут бырайыагар олоҕуран ыыталлар.
Үлэлэри ыытыыны туһааннаах управление научнай-техническэй сэбиэтигэр дьүүллэспиттэрэ. 2018 сылга Өлүөнэ бассейнын ууга управлениета Өлүөнэ уонна Халыма өрүстэргэ 8 муниципальнай тэриллии сиригэр-уотугар 47 харыы үөскүүр кутталлаах учаастагар мууһу чарааһатар үлэни ыыттылар, ол курдук 37 учаастакка хараардыы үлэтэ — 475 га, 58 км усталаах 10 учаастакка мууһу эрбээтилэр.
Бу үлэлэргэ Федеральнай агентство 18,352 мөл солкуобайы көрбүтэ.
Үлэлэри Өлүөнэҕэ Ленскэй уонна Өлүөхүмэ оройуоннарыгар – муус устар 20, Хаҥаласка, Намҥа уонна Дьокуускай куорат сиригэр-уотугар – муус устар 25 күнүгэр, Кэбээйигэ – ыам ыйын 5 күнүгэр, Халыма өрүскэ Үөһээ Халыма унна Орто Халыма оройуоннарыгар – ыам ыйын 5 күнүгэр диэри бүтэриэхтээхтэр.
СИА.
