Тохсунньу 4-6 күннэригэр, бырааһынньыктааҕы өрөбүллэргэ Экология, айылҕаны туһаныы уонна ойуур хаһаайыстыбатын министиэристибэтин Судаарыстыбаннай экологическай кэтээн көрүү иниспиэктэрдэрин кытта ураты харыстанар сирдэр госиниспиэктэрдэрэ Өлүөхүмэ оройуонун бултуур сирдэригэр бэрэбиэркэлиир уонна биотехническай тэрээһиннэри ыыттылар.
Тэрээһин чэрчитинэн дьиикэй кыылларга анаан талах быһыллан уурулунна, эбии ас кутулунна, диэн Экология министиэристибэтин пресс-сулууспата иһитиннэрэр.
Санатан эттэххэ, элбэх хаардаах ыйдар тураннар, туйахтаах кыыллар, чуолаан, туртастар хаһан аһыылларыгар ыарахан, оттоох үүнээйилэри булар уустук. Ол иһин кыһыҥҥы кэмҥэ кыылы-сүөлү харыстыыр, элбэтэр сыалтан маннык биотехническай тэрээһиннэр ыытыллаллара наада, суруйда Сайаана Львова, «Саха сирэ» саайт.
