25 От ыйа 25.07
  • 18°
  • $ 86,55
  • 94,38

Куукунаҕа кыһыннары оҕурсуну үүннэриҥ

18:12, 26 апреля 2017
Текст:
Читайте нас на
Яндекс Новости
ЯДВ

Саха сирин учуонайдара, “Сколково” пуонда уонна “Якутия” технопарк резиденнэрэ дьиэ иһигэр оҕуруот аһын үүннэрэр тэрили айдылар. Куукунаҕар маннык тэрили туруордаххына, бэйэтэ уу кутар, сырдыгы хааччыйар, уоҕурдар. Онон оҕуруот аһын бары көрүҥүн, оннооҕор клубниканы сылы эргиччи үүннэрэн сиэххэ сөп.


Төлөпүөҥҥэр анал бырагырааманы хачайдаан баран, төһө үүммүтүн, сиигэ, уота хайдаҕын ыраахтан да көрө-истэ сылдьыахха сөп. Бу тэрили «Зеленая грядка» хампаанньа дириэктэрэ Людмила Попова, Уһук Илиннээҕи Наука академиятын автоматика уонна салайыы процеһын иснтитутун Лазернай технологияҕа киинин дириэктэрэ Евгений Субботин, химик-технолог Валентин Куличкин айан оҥордулар.

Быһа холоон, сыаната 150 тыһыынча солк. буолара сабаҕаланар. Билиҥҥитэ икки кээмэйдээх: биирэ остуол анныгар угуллар уонна туспа турар улахан тэрил. LED-лаампалаах буолан, күнүстэри-түүннэри тыган, үүнээйи үүнэрэ түргэтиир. Оҕуруот аһын гидропоника ньыматынан, ол эбэтэр буору туһаммакка, ууга үүннэрэллэр.

Людмила Попова дьиэтигэр клубниканы үүннэрэн саҕалаабыт. Өр сыллаах уопут түмүгүнэн, дьиэҕэ хайдах үүннэрэр кистэлэҥнэрин баһылаан, салгыы агрономия үлэтин судургутутар тиэхиникэни толкуйдаабыт. «Якутия» технопарк бу идиэйэни өйөөн, Бүтүн Арассыыйатааҕы “Сколково” пуондаҕа киирэригэр көмөлөспүт.

Технопарк инновацияҕа дириэктэрин солбуйааччы Роман Оконешников этэринэн, бу бырайыак ордук хотугу оройуоннарга туһалаах буолуо. Күн уотуттан, дьыл кэмиттэн тутулуга суох, бэйэ үүннэрбит сибиэһэй оҕуруот аһын мотуйа олорор туохха тэҥнэһиэй?

Бу таҥас, иһит сууйар массыыналар курдук, аныгы үйэ куукунатын гаджета буолар кыахтаах. Киэҥник тарҕаныа диэн эрэнэбит, тоҕо диэтэххэ, кэнники кэмҥэ дьон сибиэһэй, экология өттүнэн ыраас аһы аһыахтарын баҕараллар. Көрүүтэ-истиитэ да судургу, оҕуруотчут буолбатах да киһи үүннэриэн сөп.

Омук экспердэрэ бу бырайыагы сэргээтилэр, салгыы маассабай оҥорон таһаарыы баар буолуо.

edersaas.ru

Следите за самым важным и интересным в Telegram-канале и WhatsApp-группе ЯСИА