21 От ыйа 21.07
  • 22°
  • $ 88,02
  • 96,04

«Кэлэ туруом Өргүөппэр…» ырыа-хоһоон түһүлгэтэ төрүттэннэ

18:10, 18 апреля 2016
Текст:
Читайте нас на
Яндекс Новости
ЯДВ

Муус устар 16 күнүгэр Өргүөт нэһилиэгэр биир дойдулаахпыт, СӨ норуотун хаһаайыстыбатын үтүөлээх үлэһитэ, Орто Халыма улууһун Бочуоттаах олохтооҕо, Россия суруналыыстарын Сойууһун чилиэнэ, хомоҕой тыллаах хоһоонньут Вера Нанова-Солдатова үбүлүөйдээх 65 сааһын көрсө ырыа, хоһоон түһүлгэтигэр муһуннубут.


Вера Спиридоновна элбэх хоһоон, ырыа ааптара. Мантан сиэттэрэн, өрөгөйдөөх үбүлүөйүн көрсө хоһооҥҥо күрэх биллэрбитигэр, биһиги улуустан эрэ буолбакка, араас сирдэртэн 118 айымньы киирдэ. Күрэх үс түһүмэҕинэн ыытылынна, ол курдук, «Анабыл хоһоон», «Төрөөбүт дойдуга таптал» уонна «Көҥүл тиэмэ».  Бу күн кыайыылаахтар ааттара билиннилэр, дьүүллүүр сүбэ бэрэссэдээтэлэ Марта Силигиянова сыанаҕа тахсан түмүгү билиһиннэрдэ. «Анабыл хоһоон» түһүмэҕэр 50 саастарыттан үөһээ кыттааччыларга бастакы миэстэни Дьокуускай куорат олохтооҕо Санаайа Петрова ылла. Иккис миэстэҕэ Өргүөт олохтооҕо Александра Павлова, үһүс миэстэҕэ Өргүөттэн Петр Афанасьев тигистилэр. «Төрөөбүт дойдуга таптал» түһүмэххэ 50-ннарыттан үөһээ саастаах кыттааччыларга Өргүөттэн төрүттээх Дьокуускай куорат олохтооҕо Мария Николаева бастаата. Валерий Васильев – Муттуххай Бороҥ (Үөһээ Бүлүү) иккис миэстэни, Мэйиктэн Владимир Федоров үһүс миэстэни ыллылар. «Көҥүл тиэмэ» түһүмэххэ 18-35 саастаах кыттааччыларга Мэйик олохтооҕо Андрей Саввинов бастакы миэстэни ылла. Оттон 50-ннарыттан үөһээ саастаахтарга Мэйиктэн Василий Иванов бастакы миэстэни, Үөһээ Бүлүүттэн Антонина Хобусарова иккиһи, Өргүөттэн Валерий Сидоров үсүһү ыллылар. Маны таһынан, Өргүөттэн төрүттээх, айар үлэнэн дьарыктанар Тамара Сидороваҕа сэмэй бэлэх туттардылар. Миэстэлэспиттэргэ сыаналаах бириистэри, ол курдук, сахалыы иһиттэри, үрүҥ көмүс симэхтэри, хаһаайыстыбаҕа туһалаах тэриллэри туттардылар.

«Анабыл хоһооҥҥо» иккис миэстэлээх Өргүөттээҕи участковай балыыһа сиэстэрэтэ Александр Павлова бастакы ситиһиитин туһунан кэпсиир: «Хоһоон куонкуруһугар бастакы кыттыым уонна ситиһиим. Бэйэм холонон көрөөччүбүн дии саныыбын. Хоһооҥҥо дьоммун хоһуйабын, үөрүүлээх түгэннэри суруйабын, ордук айылҕаҕа таҕыстахпына иэйэбин».

Бу үөрүүлээх күҥҥэ киниэхэ Өргүөт нэһилиэгин дьаһалтата, депутаттар Сэбиэттэрэ «Өргүөт нэһилиэгин Бочуоттаах олохтооҕо» үрдүк ааты иҥэрдилэр. Маны таһынан, СР норуотун айымньытын сайдыытыгар улахан кылаатын иһин СР Культуратын миниистирэ Владимир Тихонов анаабыт түөскэ кэтиллэр бэлиэни туттардылар.

Салгыы Вера Спиридоновна суруйбут хоһооннорунан ырыа айыыга мелодистар күрэхтэрэ ыытылынна. Саҥа, субу буруолуу сылдьар ырыалары истэн олус дуоһуйдубут, астынныбыт. Түмүккэ, Өргүөт олохтооҕо Анна Иванова үһүс миэстэни, иккис миэстэни Өргүөттэн төрүттээх Дьокуускай куорат олохтооҕо Зоя Петрова ыллылар, оттон бастакы миэстэнэн Быракаантан төрүттээх, Үөдүгэй нэһилиэгин олохтооҕо Николай Чуручанов «Кэлэ туруом» диэн киһи дууһатын таарыйар истиҥ ырыата наҕараадаланна! Киниэхэ, мелодист киһиэхэ, ытыс дохсун тыаһынан олус наадалаах музыкальнай центры туттардылар. Маны таһынан, саалаҕа мустубут дьон куоластарынан Дьокуускай куорат мэра, биир дойдулаахпыт Айсен Николаев туруорбут анал бирииһэ – саха быһаҕа оонньонно. Саха быһаҕын хаһаайынынан Николай Чуручанов буолла.

Следите за самым важным и интересным в Telegram-канале и WhatsApp-группе ЯСИА
Тутаах тыллар