Ил Дархан Айсен Николаев Казахстан Өрөспүүбүлүкэтигэр оробуочай сырыыта түмүктэннэ. Өрүттэр араас эйгэҕэ бииргэ үлэлииргэ интэриэстээхтэрин бигэргэттилэр.
Өрөспүүбүлүкэ президенэ Касым-Жомарт Токаев Казахстаҥҥа Саха сирин култууратын Декадатын ыытары эттэ. Кини бэлиэтээбитинэн, өрөспүүбүлүкэ Саха сирин кытта бииргэ үлэлииргэ улахан болҕомтотун уурар, тоҕо диэтэххэ, норуоттар историялара дириҥ ис сибээстээхтэр.
Казахстан премьер-миниистирэ Алихан Смаиловы уонна вице-премьер Серик Жумангарины уонна Галымжан Койшыбаевы кытта көрсүһүүгэ атыы-экономика эйгэтигэр, инвестицияҕа уонна култуура-гуманитарнай эйгэҕэ, чуолаан, кинематографияҕа бииргэ үлэлииргэ интэриэс баара этилиннэ.
Айсен Николаев цифровой технологияҕа, экономика араас салаатыгар саҥа инвестиционнай бырайыактарга үлэлиир наадатын бэлиэтээтэ.
Ил Дархан Казахстаҥҥа оробуочай сырыытын кэмигэр атыыга-эргиэҥҥэ, тыа хаһаайыстыбатыгар, промышленноска бэйэ-бэйэҕэ барыстаах этиилэр киирдилэр. Наука, чуолаан, геокриологияҕа, фундаментальнай уонна прикладнай наукаҕа уонна сылгыны иитиигэ бииргэ үлэлииргэ көрүүлэр бааллара этилиннэ.
