Аны аҕыйах хонугунан саргылаах Саҥа Дьылбыт тиийэн кэлиэ, күлүмүрдэс уоттардаах дьэрэкээн харыйа тула дьиэ кэргэн мустан олорон, Кириэмил чаһыта 12 охсуута баҕа санаатын этэн баран кырылыы көөнньөр уохтаах утаҕы көтөҕүө, бэйэ-бэйэни эҕэрдэлэһиэ.
Бу сырыыга аан дойду дьонун баҕа санаата биир соҕус буолуохтаах. Киһи-аймаҕы сэрии курдук аймаабыт, олоҕун үгэнигэр илдьэ барбыт хамсык дьаҥа халбарыйан, урукку курдук үүт-тураан күннэр-дьыллар сатыылаан, олохпут оннун буларын туһугар үгүс ыра санаа этиллиэ турдаҕа. Интэриниэтинэн бэриллэр аныгы технология төһө да сайдыбытын иһин, киһиэхэ саамай күндү баайа – доруобуйа.
Норуот эмчитэ, көрбүөччү Наталия Дмитриевна Иванова аатын билбэт киһи бука Дьокуускай куоракка суоҕа буолуо. Элбэх кыыс хаһан олоҕун аргыһын көрсөрүн, хас оҕолонорун, хаһан, ханна үлэ буларын ыйыталаспыт буолуохтаах. Кини сүтүктээх, кыһалҕалаах дьоҥҥо үгүстүк көмөлөһөр, билигин Калининград куоракка олорон үлэлиир.
Коронавирус хаһан ааһарын туһунан Наталия Иванова сүбэтин ulus.media суруйар. Кини саха дьонугар маннык сүбэлиир: “Бу хамсык туһунан сарсыардаттан киэһээҥҥэ диэри ону эрэ сонун оҥостон кэпсииллэр. Бассаап мөкү сонуннарын ааҕан киһи куттас, кыыһырымтаҕай буолар, онон итини кыччатыахха наада. Коронавирус кэлбитэ ыраатта, былырыын балаҕан ыйыттан баар, ону кулун тутарга булбуттара. Куттанан дьиэ иһигэр хаайтаран баран олоруо суохтааххыт, дьиэҕэ олорор киһи тыҥата мөлтүүр. Кыыһырбыт, куттаммыт киһи хаана хойдор. Онон кытаатан сибиэһэй салгыҥҥа хаамыахха, этэллэрин курдук илиини сууна-сотто сылдьыахха наада.
Уһаайба ылан, чааһынай дьиэҕэ олоро сатааҥ, бэйэ оҥорон таһаарбыт аһын аһыыр ордук, тастан кэлбит ас туһата суох. Билигин харчылаах эрэ киһи үчүгэйдик олорор диэн буолбатах. Оҕуруот аһын олордон, күннэтэ хамсанан, сибиэһэй салгыҥҥа сылдьан киһи үйэтэ уһуур”, – диир кини.
Наталия Дмитриевна этэринэн, хас биирдии киһи харыстыыр аанньаллардаах, ону таһынан, саха дьоно буоларбыт быһыытынан, илин саҕахтан кытара кыыһан тахсар үрүҥ күммүтүттэн көрдөһө-ааттаһа сылдьыахпытын наада.
“Ыарыы, дьаҥ туһунан кэпсиир соччото суох, туох барыта истэр. Хамсык барыа, ааһыа турдаҕа. Хас биирдии саха киһитэ туһунан сирдээх, кэтэх дьиэлээх, уһаайбалаах буолуохтаах. Таас дьиэни ким да былдьаспат, былыр былыргыттан дьон сири үрдүктүк сыаналыыр”, – диэн этэр көрбүөччү.
Ынах-сүөһү көрөн олорор тыа дьоно куорат ыалыгар ымсыырар, кинилэр курдук барыта бэлэм таас дьиэҕэ олоруон баҕарар. Ол эрэн кырдьар саастарыгар кыараҕас кыбартыыраҕа оҕолорун, сиэннэрин кытта ыга симиллэн олорон, тыыннара-быардара хаайтарар. Саха киһитэ айылҕа оҕото буоларын быһыытынан, сибиэһэй салгыҥҥа тахсан, көҥүл көччүйүөн баҕарар. Оттон куорат дьиэтиттэн таҕыстыҥ да кэлии-барыы, массыына сырыыта биир кэм субуллан олорор. Сибиэһэй салгын сиибин диэн хаампытыҥ үрдүнэн тимир көлө буруота, уматык сыта төрөөбүт алааспытын, хатыҥнардаах сыһыыларбытын кытта ама тэҥнэһиэ турдаҕа дуо?
