25 От ыйа 25.07
  • 30°
  • $ 86,55
  • 94,38

Өймөкөөн Томторугар сылгыһыттары үөрэтэр киин үлэтин саҕалаата

18:03, 10 апреля 2018
Текст:
Читайте нас на
Яндекс Новости
ЯДВ

Өймөкөөн Томторугар “Тоноор” тыа хаһаайыстыбатын производственнай кэпэрэтиибин базатыгар сылгыһыттары үөрэтэр киин аһылынна. Хаһаайыстыба салайааччыта Николай Винокуров – РФ уонна СӨ тыатын хаһаайыстыбатын үтүөлээх үлэһитэ, СӨ тыа хаһаайыстыбатыгар Судаарыстыбаннай бириэмийэтин лауреата, Россия бочуоттаах фермерэ, Өймөкөөн улууһун ытык олохтооҕо, өр сыллаах уопутугар, чинчийиитигэр олоҕуран, тыа хаһаайыстыбатын билимигэр хандьытаат буолбута.

Киини арыйыыга бырабыыталыстыба бэрэссэдээтэлин бастакы солбуйааччы э.т. Петр Алексеев, тыа хаһаайыстыбатын уонна ас-үөл бэлиитикэтин миниистирин солбуйааччы Виктор Павлов, Өймөкөөн улууһун баһылыга Михаил Захаров, Саха сиринээҕи АККОР бэрэсидьиэнэ Александр Артемьев, “Сахаагроплем” СБТ дириэктэрэ Василий Лукин, ТХА идэни үрдэтэр институтун дириэктэрэ Александра Павлова, сылгы иитэр хаһаайыстыбалар салайааччылара, сылгыһыттар, учуонайдар, сылгы исписэлиистэрэ уонна Өймөкөөн нэһилиэктэрин баһылыктара кыттыннылар.

Үөрэтэр киини министиэристибэ туттарда. 196 кв. м иэннээх, тупсаҕай оҥоһуулаах буруус дьиэҕэ 9 киһи биир кэмҥэ олорон үөрэнэр уонна аһыыр, олорор хостордоох. Эдэр сылгыһыттары Дьокуускайтан Тыа хаһаайыстыбатын академиятын преподавателлэрэ уонна Н.Т.Винокуров Иркутскайдааҕы тыа хаһаайыстыбатын академиятын үөрэнэн бүтэрбит уолаттарын Андрей, Алексей Винокуровтары кытта дьарыктыахтара. Манна сылгыһыттары сэргэ зоотехниктар, саҕалааччы фермердэр идэлэрин үрдэтиэхтэрэ, академия устудьуоннара практикаланыахтара.

Бэлиэр, «Тоноор» племенной хаһаайыстыбаҕа Таатта, Чурапчы, Сунтаар, Горнай улуустарыттан биирдии сылгыһыт тиийэннэр, учуонай Николай Винокуров сылгыны иитэр ураты ньыматыгар уһуйулла сылдьаллар. Өрөспүүбүлүкэ үрдүнэн сылгыны иитиинэн 364 тэрээһиннээх хаһаайыстыба дьарыктанар. Онон бу Өймөкөөн хайаларын быыһыгар олохсуйбут кыһа сылгыны үөрдээн иитиигэ идэтийиэхтээх исписэлиистэри суһаллык бэлэмнээн таһаарар, бастыҥ уопуту киэҥник тарҕатар оскуоланан буолуоҕар киһи саарбахтаабат.

Василий Никифоров, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА