23 От ыйа 23.07
  • 20°
  • $ 87,78
  • 95,76

Өймөкөөн көмүсчүттэрэ олохтоох ыччаты үлэҕэ ылыыга илии баттастылар

21:40, 23 апреля 2018
Текст:
Читайте нас на
Яндекс Новости
ЯДВ

Өймөкөөн улууһун киинэ Уус-Ньараҕа олохтоох ыччаты көмүс хостуур тэрилтэлэргэ сыһыаран үлэлэтэр туһунан киэҥ ыҥырыылаах мунньах буолла.


Суолталаах боппуруоһу ырытыыга көһө сылдьар мунньаҕы СӨ Нэһилиэнньэ дьарыктаах буолуутун государственнай кэмитиэтин, СӨ Промышленность уонна геология министиэристибэтин салайааччылара көҕүлээн ыыттылар.

Тэрээһиҥҥэ Томпо улууһун киинигэр Хаандыга бөһүөлэгэр баар  хайа уонна геология техникумун, улуус көмүс хостуур тэрилтэлэрин салайааччылара уонна каадыр салааларын исписэлиистэрэ, оройуоннааҕы муниципальнай тэриллиилэр баһылыктара кыттыыны ыллылар.

Улуус муниципалитетын баһылыга Михаил Захаров мунньаҕы аһарыгар Өймөкөөн улууһугар ыччаты промышленноска сыһыарыы үлэтэ өссө 2009 сылтан барарын бэлиэтээтэ. Ол кэмҥэ үлэтин саҕалаабыт  «Ыччаты — промышленноска» диэн бырайыак күн бүгүҥҥэ диэри ситиһиилээхтик үлэлии турар. Ол курдук, бастакы сылга Чурапчы уонна  Таатта улуустарыттан 14 эрэ ыччат кэлбит буоллаҕына, бүгүҥҥү күҥҥэ Өймөкөөҥҥө араас улуустартан 1000 тахса саха ыччата улуус 25 көмүс хостуур тэрилтэлэригэр  үлэлиир.

СӨ Нэһилиэнньэ дьарыктаах буолуутун государственнай кэмитиэтин салайааччытын бастакы солбуйааччы  Алексей Павлов Дьарыктаах буолуу өйөбүлүн сылыгар өрөспүүбүлүкэҕэ үлэ ырыынагын бүгүҥҥү күннээҕи туругун туһунан билиһиннэрдэ:

2018 сылга 5 000 үлэ саҥа миэстэтин тэрийиэхтээхпит. Ол иһигэр: олохтоох бородууксуйаны уонна өҥөнү оҥоруу чэрчитинэн — 1 700, инвестиция бырайыагын олоххо киллэриигэ — 2 600 үлэ миэстэтэ. 22 000 киһини үлэҕэ ылыы соруга турар. Онтон 16 000 — быстах үлэ, 6 000 — бастайааннай үлэ миэстэтэ. Сүрүн сорук —  олохтоох ыччаты промышленность тэрилтэлэригэр сыһыаран үлэлэтиигэ өрөспүүбүлкэтээҕи бырайыак чэрчитинэн  10 тыһ. киһи үлэнэн хааччыллыахтаах. Былырыын   2900 киһи промышленность тэрилтэлэригэр үлэҕэ ылыллыбыта. Онтон — 1400 ыччат, 300 — тыа сирин олохтооҕо. Быйыл дьону үлэлээх оҥорууну ситиһэр сыалтан   20-тэн итэҕэһэ суох промышленнай тэрилтэлэри кытта анал сөбүлэҥи түһэрсиэхпит, — диэн Алексей Павлов бэйэтин дакылаатыгар эттэ.

Промышленнай тэрилтэлэргэ каадыдары бэлэмнээһин туһунан Хаандыгатааҕы хайа уонна геология техникумун дириэктэрэ  Михаил Неустроев билиһиннэрдэ. Үөрэх бу  кыһата   Саха сирин хотугулуу-илиҥҥи эҥэригэр көмүс хостуур тэрилтэлэргэ каадырдары бэлэмниир тирэх тэрилтэнэн буолар. Бүгүҥҥү күҥҥэ манна 29 улуустан 250 ыччат үөрэнэр.

Уус-Ньараҕа ыытыллыбыт киэҥ ыҥырыылаах мунньаххха улуус 10 көмүс хостуур тэрилтэтэ кыттыыны ылла. СӨ Нэһилиэнньэ дьарыктаах буолуутун государственнай кэмитиэтин кытта «Поиск Золото» уонна «Тарыннааҕы көмүһү руданан хостуур хампаанньа» бииргэ үлэлээһиҥҥэ илии баттастылар.

Елена ПОТОЦКАЯ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА