Бүгүн «Дьокуускай-Нерюнгри» маршрутунан көтөр 429 №-дээх рейскэ биэс саастаах инбэлиит оҕолоох ийэни рейскэ киллэрбэтилэр, диэн “Дьокуускай” аэропордун пресс-сулууспата иһитиннэрэр.
“Рейс 7:02 көппүтэ. Дьахтар аэропорка сарсыарда 6:54, сөмөлүөт көтүө 8 мүнүүтэ иннинэ кэлбитэ, ол туһунан аэропорка туруоруллубут видеохаамыралар бигэргэтэллэр. “Якутия” авиахампаанньа бэрэстэбиитэллэрэ хойутаабыт оҕолоох пассажирканы рейскэ киллэрбэтэхтэрэ”, — диэн иһитиннэриигэ этиллэр.
Олохтоох рейстэргэ регистрация көтүөх 2 чаас иннинэ саҕаланар уонна 40 мүнүүтэ иннинэ түмүктэнэр. Регистрацияҕа хойутаабыт пассажир бу рейскэ киллэриллибэт.
СИА.
Вероника Аммосова хаартыската