Бэрэсидьиэн Владимир Путин 2024 сылы Дьиэ кэргэн сылынан биллэрбитэ. Ол чэрчитинэн, кэлэр сылга дьиэ кэргэттэри, оҕо төрөөһүнүн, демографическай бэлиитикэни өйүүр эбии миэрэлэр ылыллыахтара диэн Ил Дархан Айсен Николаев «Прямой разговор» биэрии кэмигэр эттэ.
— Арассыыйаҕа Дьиэ кэргэн сылын уонна өрөспүүбүлүкэҕэ биллэриллиэхтээх сыл чэрчитинэн, норуоппут ахсаанын элбэтэргэ туһуламмыт эбии миэрэлэри хайаан да ылыныахпыт. Өрөспүүбүлүкэҕэ нэһилиэнньэ ахсаана хас сыл ахсын элбээн иһиэхтээх. Быйыл устуоруйаҕа киирэр 1 мөлүйүөн ахсааны ситтибит, онон элбээн иһиэхпит диэн эрэнэбин, — диэн кини эттэ.
Дьиэ кэргэттэри өйүүр эбии миэрэлэр тустарынан Ил Дархан сыл аайы Ил Түмэҥҥэ туһаайар Анал этиитигэр биллэриэҕэ. Үүнэр сыл өрөспүүбүлүкэҕэ туох сылынан биллэриллэрэ эмиэ бу күн биллэр буолуохтаах.
Бу көмө миэрэлэртэн сорохторо номнуо биллэллэр: кэлэр сылтан Өрөспүүбүлүкэтээҕи ийэ хапытаалын суумата икки төгүл үрдээтэ, ону тэҥэ, 25-гэр диэри саастаах эдэр дьон ыал буолалларыгар харчы төлөнөр буолуоҕа.
