«Полярные Авиалинии» авиакомпания бөртөлүөтэ Үөһээ Халыма, Аллараа Халыма, Муома, Абый уонна Аллайыаха улуустарын хааччыйыаҕа.
Бэйэ бөртөлүөттэнэр туһунан боппуруоһу Халыма олохтоохторо сыл аайы өрөспүүбүлүкэ баһылыгар уонна бырабыыталыстыбатыгар туруорсаллара.
Медицинскэй модуллардаах бөртөлүөтү хайа баҕарар сиргэ түһэрэн, ыраах сытар нэһилиэнньэлээх пууннартан уонна учаастактартан ыарыһахтары улуустааҕы киин балыыһаҕа тириэрдэргэ туһаныахтара. Орто Халымаҕа «олохсуйбут» бөртөлүөт номнуо Өлөөкэ Күөлгэ, Березовкаҕа уонна Эбээххэ санитарнай сорудахтары толордо.
«Медицинскэй модуллаах бөртөлүөт ыарахан ыарыһахтары тиэйэргэ олус табыгастаах. Урут ыарахан ыарыһаҕы улууска тириэрдэр уонна көтүү кэмигэр анал эмтээһини саҕалыыр да кыаллыбат этэ», – диэн Орто Халыма улууһун киин балыыһатын кылаабынай бырааһа Дмитрий Третьяков иһитиннэрдэ.
Надежда ЕГОРОВА, «Саха сирэ» хаһыат, edersaas.ru, СИА.
