Ааспыт өрөбүллэргэ атырдьах ыйын 9 күнүгэр буолар Аҕыйах ахсааннаах норуоттар күннэрин көрсө Үс Хатыҥҥа өрөспүүбүлүкэ 15 хотугу улууһуттан аҕыйах ахсааннаах хотугу норуоттар ыччаттарын 2-с сугулаана буолан ааста.
Маут уонна таба — аҕыйах ахсааннаах норуоту ыкса сибээстээх, дириҥ ис хоһонноох өйдөбүллэр. Тэрийээччилэр бу тэрээһини олус сөпкө ааттаабыттар. Кырдьык да, хоту сир киһитэ табатын аркааннаан туттаҕына, салгыы көһө сылдьан айанныыр кыахтанар. Онон хотугу сир аҕыйах ахсааннаах норуоттарын олохторун сайдыытыгар туһуламмыт государственнай бэлиитикэҕэ олоҕуран, ыччаттар үс күн устата государствоттан өйөбүлү хайдах хаһан туһанарга сүбэни иһиттилэр, бэйэ бырыайактарын оҥорон көмүскүүргэ, сокуоннарга тирэҕирэргэ үөрэннилэр.
Бырабыытылыстыба бэрэссэдээтэлин солбуйааччы Александр Соловьев бастакы сугулааннааҕар үгүс улуустартан ыччат кэлбитин бэлиэтээтэ уонна: «Бу тэрээһин силистэнэн-мутуктанан бардаҕына, аны хоту улуустарынан киэҥник ыытылларын ситиһиэхпит», — диэн бэлиэтээтэ.
Ыччат сугулаанын тэрийиини көҕүлээбит гражданскай уопсастыба институттарын сайыннарыы министирэ Сардаана Гурьева тэрээһин аһыллыытыгар:
«Государственнай бэлиитикэни ыытыыга ыччаттарга тирэҕирээри, маннык тэрээһиннэри ыытабыт. Бүгүҥҥү «Маут» аркаан быраҕан, эһиэхэ сайдыы суолун тэлэргэ кыаҕы биэриэ», — диэн эрэнэрин биллэрдэ.
Оттон Ил Түмэн депутата, Аҕыйах ахсааннаах норуоттар ассоциацияларын президенэ Андрей Кривошапкин ыччаттарга туһаайан:
«Гражданскай уопсастыба министиэристибэтэ тэриллээт да, аҕыйах ахсааннаах норуоттарга улахан болҕомтотун уурбута. «Маут» эмиэ бу министиэристибэ салайыытынан тэриллэн, эһиэхэ ыччаттарга улахан өйөбүл оҥоһулларын бэлиэтэ. Ол ону тэрээһин ис хоһооно да туоһулуур — аҕыйах ахсааннаах норуоттар уопсастыбаннай түмсүүлэрин үлэлиир хайысхаларын тобулуу, гранынан өйөөһүн. Онон тустаах өйөбүлүнэн туһанан, инникигэ сайдыы олугунан, аны бэйэҕит суолгутун тэлиҥ!», — диэн алгыс тылын тиэртэ.
Сыччах биир сылга — кулун тутарга, атырдьах ыйыгар уонна сэтинньигэ — аҕыйах ахсааннаах ыччаттарга анаммыт үс тэрээһини ыытыы, кырдьык да, улахан өйөбүл бэлиэтэ.
