Халаантан эмсҕэлээбит Саха сирин олохтоохторугар бары өттүттэн көмө оҥоһуллуоҕа. Ол курдук, босуобуйа ылар дьиэ кэргэн тута хас да ыйдааҕытын, оттон Аҕа дойду Улуу сэриитин бэтэрээннэрэ дьиэлэрин өрөмүөннээһиҥҥэ 30-туу тыһыынча солкуобайы ылыахтара. Бу туһунан СИА-ҕа регион үлэҕэ уонна социальнай сайдыыга миниистирэ Александр Михеев кэпсээтэ.
“Ый аайы босуобуйа ылар дьиэ кэргэн абаансанан үс ыйы – бэс, от, атырдьах ыйдарын ылыахтара. Ол эрээри дьон ылалларын-ылбаттарын бэйэлэрэ быһаарыахтара”, — диэтэ Александр Михеев.
Элбэх оҕолоох ыаллар оҕолоро Дьокуускай таһынааҕы “Виктория” сайыҥҥы лааҕырга сынньаныахтарын сөп.
Оттон Аҕа дойду Улуу сэриитин бэтэрээннэригэр биэдэмистибэ дьиэлэрин өрөмүөннэнэллэригэр көмөлөһүөҕэ – биир киһиэхэ 30-туу тыһыынча солкуобайы көрүөҕэ.
Вероника Аммосова,
Мария Васильева хаартыската.
