«Саха сирэ» хаһыат эрэдээксийэтигэр ааҕааччы санаатын этэр, махтанар суруга күн аайы кэриэтэ киирэ турар.
Соторутааҕыта Нам улууһуттан Екатерина уонна Игнатий Ивановтартан маннык ис хоһоонноох сурук кэлбитэ:
«Махтал тыл бастыҥын биһиги оҕолорбутугар өрүү күүс-көмө, өйөбүл буолар Нам улууһун көрбөттөр уопсастыбаларын бэрэссэдээтэлигэр Алексей Соловьевка, кини сэкирэтээригэр Татьяна Осиповаҕа тиэрдэбит. Нам улууһун Бочуоттаах гражданинын, сэрии бэтэрээнин, көрбөттөр уопсастыбаларын бэрэссэдээтэлэнинэн үлэлии сылдьыбыт Петр Николаевич Пестряков аатынан истипиэндьийэни туттарбыт Нам улууһун «Быйаҥ» АУо бэрэссэдээтэлигэр Руслан Окороковка ыалдьар оҕолордоох дьону өйөөбүтүгэр эмиэ өрүү махтана сылдьыахпыт. Екатерина, Игнатий Ивановтар уонна оҕолорбут Эрханы кытта Эрсан».
Бу сурук сүнньүнэн Нам улууһун көрбөттөр уопсастыбаларын сэкирэтээрэ Татьяна Осипованы кытта кэпсэтэ сырыттым.
— Уопсастыбабытыгар 71 чилиэннээхпит. Петр Николаевич оҕолорун дьиэ кэргэттэрэ сыл аайы уопсастыбаҕа баар ыччаттарга аҕаларын аатынан бириэмийэ биэрэллэр. Урукку сылларга устудьуоннабытыгар көмөлөһөллөрө. Оҕолор улаатан, аны кырааччааннарбытын өйүүллэр, — диэн кэпсиир Татьяна Иннокентьевна.
Петр Пестряков уоллаах кыыһа Петр Петрович уонна Айталина Петровна кэргэттэрин Людмила Григорьевнаны уонна Руслан Егоровиһы кытта кыттыһан, аҕаларын үйэтитэр истипиэндьийэни олохтообуттара уонча сыл буолбут. Бу туһунан Нам улууһун ытык киһитин күтүөтэ Руслан Окороков санаатын бу курдук үллэһиннэ:
— Нам улууһун Бочуоттаах гражданина, сэрии бэтэрээнэ Петр Николаевич Пестряков көрбөттөр уопсастыбаларын бэрэссэдээтэлэнинэн 1988-2002 сылларга үлэлээбитэ. Киһи быһыытынан оҕонньор дьоҥҥо өрүү үтүөнү баҕара, көмөлөһө, өйүү сылдьар айылгылаах ытыктанар киһи этэ. Аҕабыт аатын үйэтитэр соруктаах икки ыал харчынан кыттыһан, үөрэх сыла түмүктэниитэ инбэлиит устудьуоннарга айаннарыгар, үөрэххэ киириилэригэр өйөбүл оҥорон, харчынан бириэмийэ биэрэбит. Быйыл истипиэндьийэбитин Дьокуускайга көрбөт оҕолор оскуола-интернаттарыгар үөрэнэр игирэ уолаттарга — Эрхан уонна Эрсан Ивановтарга анаатыбыт.
Бу курдук умнуллубат ытык дьоннорун үйэтитэн араас тэрээһиннэри оҥороллорун, истипиэндьийэлэри олохтуулларын туһунан Саха сирин бары улуустарыттан ыраас, сырдык сонуннар үксүү турдуннар!
Елена ПОТОЦКАЯ, «Саха сирэ» хаһыат, edersaas.ru
Хаартыска: Ивановтар дьиэ кэргэн архыыптарыттан
