Үөһээ Бүлүү сэлиэнньэтин килбэйэр киинигэр Исиидэр Бараахап аатынан уулусса 13 «а» нүөмэригэр үс мэндиэмэннээх, толору хааччыллыылаах, аныгы ирдэбилгэ толору эппиэттиир, 24 кыбартыыралаах таас дьиэ күлүүстэрин хаһаайыттарга туттардылар. Ил Дархан Айсен Николаев кыттыыны ылла.
2022 сыл Өрөспүүбүлүкэҕэ Ийэ сылынан биллэриллибитэ. Айсен Сергеевич Николаев «Ийэ дьолуттан уопсастыба дьоло түстэнэр» диэн этэн туран, саҥа дьиэ хаһаайкаларыгар, элбэх оҕолоох иһирэх ийэлэргэ Вероника Соргоеваҕа, Александра Федороваҕа, Светлана Васильеваҕа кыбартыыраларын күлүүстэрин, бэлэхтэри туттартаата.
Онтон аҕам саастаахтарга Аркадий Саввиновка (1949 с.т.), Вера Яковлеваҕа (1947 с.т.) уонна Светлана Ивановаҕа (1951 с.т) дьиэлэрин күлүүһүн улуус аҕа баһылыга Владимир Поскачин биэртэлээтэ.
Бу дьаһал Саха автономията быйыл төрүттэммитэ 100 сылыгар уонна Исиидэр Бараахап албан аатыгар ананна.
Кыраһыабай көстүүлээх, баараҕай дьиэни туппут “Стройинжиниринг” тэрилтэ генеральнай дириэктэрин солбуйааччы Николай Андреев саҥа дьиэ Бэлиэ күлүүһүн Үөһээ Бүлүү нэһилиэгин баһылыгар Максим Силигияновка утары уунна.
Ааптар: Валентина Догоюсова, Үөһээ Бүлүү
