25 От ыйа 25.07
  • 29°
  • $ 86,55
  • 94,38

Үөһээ бүлүүлэр Сомоҕолоһуу сыла биллэриллибитин биһирииллэр

14:49, 21 декабря 2018
Текст:
Читайте нас на
Яндекс Новости
ЯДВ

Бу нэдиэлэҕэ Ил Дархан Айсен Николаев Анал этиитигэр саамай суолталааҕынан 2019 сылы Норуот түмсүүтүн, сомоҕолоһуутун сылынан буолуохтааҕын биллэрбитэ буолар. Чахчы да бары биир санаанан салайтаран сомоҕолостохпутуна, ханнык баҕарар дьыаланы, үлэни кыайыахпыт турдаҕа. «Үөһээ Бүлүү» хаһыат бу Анал этиигэ билигин улууска  таһаарыылаахтык үлэлии-хамсыы сылдьар дьонтон санааларын ыйыталаста.


Ил Дархан өрөспүүбүлүкэ уопсастыбаннаһыгар Анал этии оҥордо. Онно кини Саха сирэ инники өттүгэр хайдах сайдыахтааҕын, ханнык сүрүн соруктар туралларын саас-сааһынан ырытан кэпсээтэ. Үөһээ бүлүүлэр үүнээри турар 2019 сылы Сомоҕолоһуу сылынан биллэрбитин биһирээтилэр.


Михаил Хаччагаев, Мэйик нэһилиэгин баһылыга:
— Ил Дархан Анал этиитигэр тыа хаһаайыстыбата тыа сирин сайдыытын кытта тэҥҥэ баран иһиэхтээҕин туһунан бэлиэтээн эттэ. Соторутааҕыта Айсен Николаев өрөспүүбүлүкэ тыатын хаһаайыстыбатын сайыннарыыга аналлаах Ыйаах таһаарбыта. Онно кэккэ санаабын этиим. Урукку өттүгэр тыа хаһаайыстыбатын сайыннарыыга элбэх үп-харчы көрүллэн үлэ ыытыллыбыта. Ол гынан баран, хомойуох иһин, тоҕо эрэ күттүөннээх көрдөрүүнү ситиһэ иликпит. Тыа хаһаайыстыбатын бородууксуйатын элбэҕи оҥоруу кыайтарбата.
Мин маннык этиилээхпин. Нэһилиэктэр дьаһалталара тыа хаһаайыстыбатын сайыннарыыга төһө үбү көрөллөр даҕаны улуус уонна өрөспүүбүлүкэ бүддьүөттэриттэн оччо тыырыллара буоллар. Көдьүүһэ улахан буолуох этэ. Бастакытынан, нэһилиэк баһылыктара олохтоохтор тугунан тыынан үлэлээн олороллорун үчүгэйдик билэллэр. Ол курдук, тыа хаһаайыстыбатыгар ким-хайдах дьаһынан-дьапсынан үлэлиэн сөбүн көрөн, онно быһаччы көмө оҥорору нэһилиэк баһылыктара, дьокутааттара эрэ быһаарар кыахтаахтар.
Мэйик туһунан этэр буоллахха, кэлиҥҥи кэмҥэ олохтоохтор тыа хаһаайыстыбатын сайыннарыыга үлэ күүскэ барыахтааҕын үчүгэйдик өйдөөтүлэр. Сөптөөх үлэни ыытарга бэлэмнэрин этэр буоллулар. Былырыын биир олохтоохпут тыа хаһаайыстыбатын министиэристибэтин «Саҥа саҕалааччы фермер» Гранын ылан, онон сөптөөх бааза тутта. Сылгытын лаппа элбэттэ. Быйыл хас даҕаны киһи баҕа өттүлэринэн сир ылан, хортуоппуй, хаппыыста үүннэрдилэр. Өҥ сайын буолан, оҕуруоттарын аһын нэһилиэнньэҕэ атыылаатылар. Онон тыа хаһаайыстыбатынан дьарыктаныан, үлэлиэн баҕалаахтарга нэһилиэк дьаһалтата көмөлөһөр былааннаахпыт. Ол курдук, эһиил нэһилиэккэ тыа хаһаайыстыбатын сайыннарыыга бүддьүөппүтүттэн 3 мөл. солк. көрөрү былааннаатыбыт.


Спиридон Борбуев, улуустааҕы үөрэх управлениетын начаалынньыга:
— Саҥа талыллыбыт Ил Дархан бастакы Анал этиитин испэр олус күүппүтүм, тугу диирин кэтэспитим. Айсен Сергеевич үлэтин кэтээн көрдөххө, өрөспүүбүлүкэ федеральнай былааһын кытта ыкса үлэлэһэрэ күүһүрбүтүн бэлиэтиэхпин баҕарабын. Билиҥҥи тэтимнээх олоххо үлэҕэ сыһыан уларыйарын, ол эбэтэр бырайыактыыр офис быһыытынан барыахтааҕын эттэ. Хас биирдии эппиэттээх киһи турбут кыһалҕаны тиһэҕэр тиэрдиэр диэри үлэлиэхтээҕин ыйда.
Биир сүрүн боппуруоһунан үөрэххэ туһаайан этиитэ буолла. Ол курдук, олоҕу хамсатар күүс үөрэх буоларын тоһоҕолоон бэлиэтээтэ. Сэтинньи ыйынааҕы Ыйааҕар эппитин курдук, биһиги өрөспүүбүлүкэбит дойду 15 бастыҥ үөрэхтээх эрэгийиэннэригэр киириэхтээҕин санатта. Маны ситиһэр сыалтан хас биирдии талааннаах оҕолору өйүүрү уонна талааннары арыйар, чочуйар анал кииннэр баар буолуохтаахтарын ыйда. Күн бүгүн аан дойдутааҕы уһук хоту оскуолата 2019 сылтан үлэлиэхтээҕин, чааһынай дьону кытта кыттыгас «Хотугу сулус» аан дойду бары ирдэбилигэр эппиэтиир киин наадалааҕын ыйбытын толору өйүүбүн. Билиҥҥи оҕолор интэриниэт ситиминэн аан дойдуну киэҥник анааран көрөр буоллулар, киинтэн ыраах сытар буруйбутугар кыайан оҕолорбутун таһаарбаппыт, сөптөөхтүк сайыннарбаппыт. Онон итинник улахан таһымнаах хамсаныылар  оҕолорбутугар кыах биэрэллэр. Олус киэҥник олорор буоламмыт хас биирдии нэһилиэккэ оскуола, оҕо саадын дьиэлэрин тутуу күүскэ турар. Үөрэх тэрилтэтэ нэһилиэк сайдар киинэ буоларынан, олохтоохтор оскуоланы батыһан атын сиргэ барбаттарын туһугар саҥа дьиэлэри тутан биэрии саамай сытыы боппуруоһунан буолар. Инникитин кыра нэһилиэктэргэ учуутал тиийбэт диэн кыһалҕаны аччатарга Интэриниэт көмөҕө кэлиэҕэ. Быстах кэмҥэ учуутал суоҕун сетевой үөрэхтээһининэн солбуйуохпут.
Үөһээ Бүлүү улууһугар быйыл оптика утаҕа киириэҕэ. Эбии улуус бүддьүөтүттэн үп көрөн нэһилиэктэри бары күүстээх ситимҥэ холбуохпут. Бу үлэ барыта уопсастыба түмүстэҕинэ кыаллар, аҥардас үөрэххэ оҕо уонна учуутал эрэ кыһаллыа суохтаах. Өрөспүүбүлүкэ үрдүнэн 2019 сыл норуот Сомоҕолоһуутун сылынан биллэриллибитэ саамай сөп. 

Ааптар: Александр ТАРАСОВ

Следите за самым важным и интересным в Telegram-канале и WhatsApp-группе ЯСИА