Саха сирин парламенын вице-спикерэ Ольга Балабкина эдэр ыал оҕолонноҕуна, дьиэ иһин төлүүр ипотекатын сороҕун государство уйунар бырагырааматын дьүүллэһэр оробуочай мунньаҕы ыытта.
Дьиэ кэргэҥҥэ оҕо төрөөтөҕүнэ, государство ипотека сороҕун уйунарын туһунан этии кулун тутар 25 күнүгэр «Биир ньыгыл Россия» баартыйа «Эффективная социальная политика: новые решения» форумугар аан бастаан этиллибитэ. Онно Госдума үлэҕэ, социальнай политикаҕа уонна бэтэрээннэр дьыалаларыгар кэмитиэтин бэрэссэдээтэлэ Ольга Баталина ити көҕүлээһини сиһилии быһаарбыта.
Саҥа саҕалааһыны ДьКХ, тутуу министиэристибэлэрин, ипотека кредитин агентствотын уонна олорор дьиэ тутуутун сайыннарыы фондатын кытта дьүүллэспиттэрэ. Этиини баартыйа бэрэссэдээтэлэ, РФ премьер-миниистирэ Дмитрий Медведев өйөөбүтэ.
Дьокуускайга буолбут мунньах кыттыылаахтара эдэр ыалы өйүүргэ бу көдьүүстээх быһаарыы буоларын бэлиэтээтилэр. Маны ымпыктаан ырытан Саха сиригэр киллэрэр механизымнары толкуйдуохтара.
