Саха сирин бырабыыталыстыбата уонна парламена, фанаттар, доҕотторо уонна чугас дьоно бүгүн саха спортсмена, саха норуотуттан көҥүл тустууга бастакы олимпийскай чемпион Роман Дмитриев сырдык кэриэһин Хомсомуол болуоссатыгар бэлиэтээтилэр.
Тэрээһин үгэскэ кубулуйда, сылын аайы кулун тутар 7 күнүгэр ыытыллар.
Бырабыыталыстыба вице-премьера, улуу спортсмен 75 сылын бэлиэтиир тэрийэр хамыыһыйа бэрэссэдээтэлэ Сергей Местников эппитинэн, үбүлүөйдээх бырагыраамаҕа хас да көҕүлээһин киирэр. Ол иһигэр олимпийскай саппаас училищетын материальнай-техническай баазатын саҥардыы уонна өрөмүөн, Дьокуускайга Роман Дмитриев аатынан кытылы тупсаран оҥоруу, норуоттар ардыларынааҕы турнирдары ыытыы.
