Национальнай колорит параадынан буолла: норуот оҥорон таһаарыытын маастардара, айар түмсүүлэр уонна уопсастыбаннай тэрилтэлэр бэрэстэбиитэллэрэ Саха сирин норуоттарын үгэскэ кубулуйбут таҥастарын көрдөрдүлэр.
Култуура миниистирэ Афанасий Ноев кыттыыны ылла. Кини 2012 сыллаахха олохтоммут Норуот маастарын күнүнэн эҕэрдэлээтэ.
Чурапчы улууһун баһылыга Степан Саргыдаев ЯСИА-ҕа эппитинэн, быйыл оройуон төрүттэммитэ 95 сылын бэлиэтиир. «Биһиги норуот маастардарын түмэн, 50 киһи, ол иһигэр нэһилиэк баһылыктара уонна аатырбыт маастардар буолан манна кэллибит. Биһиги ортобутугар ааттаах-суоллаах маастардар Надежда Ахматова, Татьяна Карсанаева бааллар. Өбүгэ үгэһин харыстыыбыт, эдэр көлүөнэҕэ тириэрдэбит. Биһиги Саха сирин маастардарынан киэн туттабыт», – диэтэ кини.
Иван Иванов, Таатта улууһун норуот айар дьиэтин пуондаҕа кылаабынай методиһа улуус делегациятын кэпсээтэ. «Биһиги маастардарбыт Саха театрыгар, Кулаковскай аатынан норуоттар доҕордоһууларын дьиэтигэр уонна Арчы дьиэтигэр тэрээһиннэргэ кытталлар. Сэлэлии хаамыыга таатталар 30 буолан сылдьабыт, норуоппут маастара 35-тэр. Тимир уустара, туостан тигээччилэр, сиэлинэн өрөөччүлэр, мас уустара бааллар», — диэтэ.
Сэлэлии хаамыы Өрөспүүбүлүкэ болуоссатыгар оһуохайынан түмүктэннэ.
