Тутуллубуттар ортолоругар “Вести Якутии” кэрэспэдьиэнэ Сарыал Никифоров, “Якутия” хаһыат суруналыыһа Аламжи Будаев уонна “Вторник” хаһыат эрэдээктэрэ Егор Карпов бааллара.
Бу Дьокуускайга Орджоникидзе болуоссатыгар Навальнайы өйөөччүлэр миитиннэригэр.
Араас сыанабылынан, тэрээһиҥҥэ 70-тан 150-ҥа диэри киһи кыттыбыт. Анатолий Ноговицын уонна Эрэл Васильев кылгас тыл этиилэрин кэнниттэн полиция уонна куорат дьаһалтатын бэрэстэбиитэллэрэ кэлбиттэр. Кинилэр миитин сөбүлэһиннэриллибэтэҕин этэн туран, тарҕаһалларыгар көрдөспүттэр.
Навальнай Саха сиринээҕи штабын салайааччыта миитин кыттыылаахтарыгар Ленин болуоссатыгар диэри хаамалларыгар ыҥырбыт. Болуоссакка өссө биир миитин буолбут. Болуоссакка гражданскай таҥастаах Саха сирин ИДьМ полиция уопсастыбаннай бэрээдэги араҥаччылааһыҥҥа начаалынньыгын солбуйааччы Олег Лебедь, Саха сирин ыччат миниистирэ Иван Луцкан, Саха сирин Ил Дарханын Дьаһалтатын Ис бэлиитикэҕэ департаменын салайааччыта Афанасий Владимиров уо.д.а бааллара ыйыллар.
Ситэриилээх былаас бэрэстэбиитэллэрэ Луцкан уонна Владимиров миитиннээччилэргэ чугаһаабатахтар уонна кэпсэтэ да сатаабатахтар. Кинилэр ойоҕостон көрөн турбуттар уонна полиция сотрудниктарын эрэ кытта кэпсэппиттэр диэн суруллар.
Онтон мустубут дьон Доҕордоһуу болуоссатыгар диэри күүлэйдии баран иһэр курдук хаампыттар, манна кинилэри полиция сотрудниктара оптуобустарга кэтэһэн турбуттар. Онуоха миитиннээччилэр төттөрү эргийэн Ленин болуоссатын диэки барбыттар.
“Илин эҥэр” маҕаһыын таһынааҕы туорааһыҥҥа миитиннээччилэри полиция сотрудниктара туппуттар. 50-ча киһи тутуллубут.
Тутуллубуттар ортолоругар уопсастыбанньык Эрэл Васильев, Навальнай штабын начаалынньыга Анатолий Ноговицын, Сулустаана Мыраан уо.д.а. эмиэ баар курдуктар. Ону тэҥэ “Вести Якутии” кэрэспэдьиэнэ Сарыал Никифоров, бырабыыталыстыба хаһыатын суруналыыһа Аламжи Будаев уонна “Вторник” хаһыат эрэдээктэрэ Егор Карпов эмиэ тутуллубуттар.
Санатан эттэххэ, миитин куорат дьаһалтатын кытта сөбүлэһиннэриллибэтэх.
Тутуллубут 85 киһиттэн 32-тэ саастарын ситэ илик оҕо. Кинилэр ортолоругар 13-14 саастаах икки кыыс баара бэлиэтэммит, кинилэр оскуолаттан оптуобус тохтобулугар баран иһэллэрэ диэн этиллэр. “Дьокуускайдааҕы” ММУ сотрудниктара кинилэр төрөппүттэригэр да эрийбэтэхтэр.
Бэҕэһээҥи туругунан “Дьокуускайдааҕы” ММУ личнэй састааба барыта боротокуоллары толорууга уонна тутуллубуттар туох дьон буолалларын быһаарыыга ыҥырыллыбыт.
“Дьокуускайдааҕы” ММУ дьиэтигэр тутуллубут саастарын ситэ илик оҕолор төрөппүттэрэ кэлитэлээбиттэр. Кыыһырбыт төрөппүттэр төлөпүөннээбиттэр.
