Дьокуускайга от ыйын 14 күнүгэр түүн Ленин пааматынньыгын көтүрдүлэр. Скульптураны быстах харайыыга илдьэ бардылар.
1967 сыллаахха турбут боруонса пааматынньык региональнай суолталаах култуура нэһилиэстибэтэ буолар, онон икки түһүмэҕинэн саҥардыахтаахтар. Бары үлэни 2023 сыл ахсынньытыгар диэри бүтэрэр былааннаахтар.
Бырайыак быһыытынан саҥа акылаат оҥоруохтаахтар, гранитнай плиталары уонна ууну ыытар трибунаны, сибэкки клумбата турар бетону уларытыахтаахтар, болуоссат асфальт бүрүөһүнүн саҥардыахтаахтар. Скульптураны бэйэтин ыраастыахтара, итэҕэстэрин туоратыахтара, көмүскүүр сабыынан сотуохтара.
Санатан эттэххэ, култуура пааматынньыктарын өрөмүөннээһиҥҥэ лицензиялаах «Уран» устуудьуйа куонкуруска кыайбыта. Контракт суумата 20 мөлүйүөн солкуобай буолла.
