Дьокуускайга онус үбүлүөйдээх «МаМалыш» бэстибээл өрөспүүбүлүкэҕэ Ийэ сылыгар ананна. Ийэ буолууну пропагандалыыр тэрээһин үтүө үгэскэ кубулуйда, суруйар СИА.
Бэстибээл чэрчитинэн, куонкурустар ыытылыннылар, поликлиникалар, медицина кииннэрин исписэлиистэрин консультациялара, доруобай аһы бэлэмнээһиҥҥэ, оҕону сөпкө бэрийиигэ маастар-кылаастар буоллулар.
Элбэх оҕолоох ийэлэр Евдокия Михайлова уонна Виктория Султашова «МаМалыш» бэстибээлгэ бастакыларын кытталлар, ол иһин куонкуруска болҕомтолоохтук бэлэмнэммиттэр.
«Аанньал уобараһын ылбычча талбатаҕым, тоҕо диэтэххэ, оҕоҕо ийэтэ аанньал кэриэтэ, кинини харыстыыр, кыһанар. Мин үс кыыстаахпын, төрдүспүтүн күүтэбит», — диэтэ Евдокия Михайлова.
Виктория Султашова куонкуруска кыыһын кытыннарбыт, уобараһы сэргэхситэр сыалтан. «Биһиги көстүүмнэрбитигэр сахалыы матыыбы киллэрдибит. Кыыһым миэхэ үөрүүнү кытта көмөлөһөр. Маннык куонкурустарга куруук кыттабыт, онон бу да сырыыга туора турбатыбыт. Бэһис оҕобутун күүтэбит, улахаммыт уол, атыттар кыргыттар. Күүтэр оҕобут уолун кыыһын билэ сатаабаппыт, сюрприз буоллун», — диэтэ кини.
Доруобуйа харыстабылын министиэристибэтин кылаабынай акушер-гинеколога Людмила Шек тэрээһин сүрүн суолтатын кэпсээтэ. «Олус суолталаах тэрээһин, быйыл онус сыла. Кыттааччы ахсаана элбэх. Сүрүн сыала — үүнэр көлүөнэ моральнай-духовнай сайдыыта, ийэ буолууга үтүө сыһыан, дьиэ кэргэн статуһун өрө тутуу. Сылын аайы киэбэ уларыйан иһэр, Саҥаттан саҥа киирэр», — диэтэ кини.
Хаартыска: Мария Васильева, СИА
