21 Тохсунньу 21.01
  • -48°
  • $ 73,82
  • 83,32

Дьокуускайга Арктика оскуолата тутуллуо

16:30, 26 апреля 2017
Текст:

Дьокуускайга “Сосновый бор” оҕону сынньатар-чэбдигирдэр киин базатыгар 220 миэстэлээх норуоттар икки ардыларынааҕы Арктика оскуолата тутуллуохтаах. Билигин бырайыактыыр үлэтэ түмүктэнэн эрэр. Тутуу бу сылга саҕаланнаҕына, 2019 сылга бүтэн, үлэҕэ киириэхтээх.


Маннык инновационнай оскуола Уһук Илин регионугар суох. Судаарыстыба уонна чааһынай бииргэ үлэлэһии түмүгүнэн, бырабыыталыстыбаны кытта сөбүлэһии түһэрсэн, «Газэнергомонтаж» ХЭТ тутара былааннанар.

Араас этээстээх алта блоктан турар, 7200 кв. м. иэннээх улахан оскуола тутуллуохтаах. Биология, химия, информатика, физика кабинеттара туспа лабораториялаах, 50 киһи батар мультимедийнай конференц-саалалаах, планетарийдаах, Арктика цивилизациятын кэпсиир мусуойдаах, бассейннаах, киинэ көрдөрөр, спортивнай уонна үҥкүүлүүр саалалардаах, улахан библиотекалаах, муусуканан дьарыктанарга аналлаах кылаастардаах буолуохтаах. Сынньалаҥ кэмигэр оҕолор фонтаннаах, кыһыҥҥы саадтаах киэҥ-куоҥ хоско оонньуохтара. Ону тэҥэ тыйаатыр көстүүмнэрин харайар уонна гримернайдаах аактабай саала баар буолуоҕа.

Биллэн турар, минньигэс астаах остолобуой үлэлиэҕэ. Иһэр уу хаачыстыбатын анал лабораторияҕа бэрэбиэркэлиэхтэрэ. Оттон оскуола таһыгар баскетбол, волейбол, футбол оонньуур былаһааккаларга, гимнастика муннугар, анал оонньуур сирдэргэ оҕолор доруобуйаларын чэбдигирдиэхтэрэ.

Бу, чахчы да, оҕо дьоҕурун бары өттүнэн арыйар, билиини-көрүүнү иҥэрэр, сайдыылаах кэм ирдбиллэригэр эппиэттэһэр, ыра санаа оскуолата буолсу.

edersaas.ru

0
0
21 января 21.01
  • -48°
  • $ 73,82
  • 83,32