Дьокуускай куорат Гагаринскай уокуругар 38 №-дээх оскуола икки дьиэтигэр хапытаанай өрөмүөн түмүктэннэ. Үлэни «Оскуола үөрэҕириитин ситимин модернизациялааһын» федеральнай бырагыраама чэрчитинэн ыыттылар.
Саҥардыллыбыт оскуоланы Саха сирин баһылыга Айсен Николаев уонна куорат баһылыга Евгений Григорьев көрдүлэр. Бэдэрээтчит өрөмүөн үлэтин муус устар 11 күнүгэр саҕалаабыт уонна икки эбийиэги атырдьах ыйын 10 күнүгэр туттарда.
«Оскуола саҥа үөрэх дьылыгар толору бэлэм, манна оҕолору үөрэтэргэ кэлиҥҥи уон сылга бары усулуобуйа тэрилиннэ», — диэн Айсен Николаев бэлиэтээтэ.
